پەرلەمانتارانی عێراق پێشبینی دەکەن لە مانگی پێنجدا دەنگ بە پرۆژەیاسای بودجە بدرێت

 

دوای دەرهێنانی خەرجییەکانی حاکیمە و سیادیی کە تێیدا 16 ترلیۆن و 500 ملیار دینار وەک پشکی کوردستان دانراوە، واتە ئەگەر رێککەوتنی هەولێر و بەغدا وەک خۆی جێبەجێ بکرێت مانگانە یەک ترلیۆن و 375 ملیار دینار بۆ هەرێمی کوردستان دەنێردرێت. 

 

د. ڤیان سەبری، سەرۆکی فراکسیۆنی پارتی دیموکراتی کوردستان لە پەرلەمانی عێراق دەڵێت: کرێی گواستنەوە دانراوە، بەڵام کرێی دەرهێنان و هەناردەکردنی دانەنراوە، دەبێت ئەوەش دابنرێت کە نزیکەی دوو ترلیۆن و 400 ملیار دینارە، ئەگەر ئەوەش دابنرێت پشکی کوردستان زیاتر دەبێت، دەگاتە 18 بۆ 19 ترلیۆن دینار. 

 

لیژنەی دارایی رۆژانە لەگەڵ وەزارەت و دامەزراوەکانی حکومەتی عێراق کۆدەبێتەوە تاوەکو پەلە بکرێت لە تێپەڕاندنی پرۆژەیاساکە. پێشبینی پەرلەمان وایە لەنێو مانگی پێنجدا دەنگ بە پرۆژەیاسای بودجە بدرێت. 

 

ئەحمەد روبەیعی، ئەندامی پەرلەمانی عێراق بە رووداوی گوت: پێمان وایە ئەو پاڵنەرە هەیە کە زۆربەی پەرلەمانتاران و فراکسیۆنەکان لەگەڵ ئەوەدان کە پرۆژەیاسای بودجەی گشتیی عێراق دەنگی لەسەر بدرێت بەر لە کۆتایی پشووی وەرزی یاسادانانی پەرلەمان. 

 

هەرچەندە بەپێی راپۆرتی وەزارەتی پلاندانانی عێراق دەبوو 14%ـی بودجەی گشتیی عێراق بۆ هەرێمی کوردستان بوایە، بەڵام دواجار رێژەکە کەمکرایەوە بۆ 12.67%.