دەستەی دەستپاکی: عێراق بووە ئەندامی کۆمەڵەی نێودەوڵەتی بۆ رووبەڕووبوونەوەی گەندەڵی

 

 

دەستەی دەستپاکی لە راگەیێندراوێکدا کە ئەمڕۆ سێشەممە بڵاویکردووەتەوە، رایگەیاندووە، "بە نوێنەرایەتیی دەستەی دەستپاکیی فیدراڵی، دوای واژۆکردنی داواکاریی ئەندامبوون و ناردنی بۆ کۆمەڵەکە، کۆماری عێراق بووە ئەندامی کۆمەڵەی نێودەوڵەتی بۆ رووبەڕووبوونەوەی گەندەڵی."

 

دەستەی دەستپاکی دەڵێت، کۆمەڵەکە پێشوازیی لە ئەندامبوونی عێراق کردووە و داوای کردووە، کۆبوونەوەیەکی ئۆنلاین لەگەڵ ئەمینداری گشتیی کۆمەڵەکە بکرێت، بۆ تاوتوێکردنی پێویستی و پێشنیازەکانی دەستەی دەستپاکیی عێراق.

 

کۆمەڵەی نێودەوڵەتی بۆ رووبەڕووبوونەوەی گەندەڵی، لە ساڵی 2006 دامەزراوە و تایبەتە بە یارمەتیدانی ئاژانس و دەستەکانی رووبەڕووبوونەوەی گەندەڵی لە سەرانسەری جیهان، بۆ چەسپاندنی دەستپاکی و جێبەجێکردنی رێککەوتننامەی نەتەوە یەکگرتووەکان بۆ رووبەڕووبوونەوەی گەندەڵی.

 

دەستەی دەستپاکی فیدراڵی باسی لەوەش کردووە، "کۆمەڵەکە کۆنفرانسی ساڵانە و کۆبوونەوەی گشتی لە چەندین وڵات رێکخستووە، لەوانە نەمسا، چین و قەتەر، ئەمە جگە لە بەڕێوەچوونی کۆڕ،  وۆرکشۆپ و پرۆگرامی راهێنان، بۆ بەهێزکردنی پەیوەندییەکان لەگەڵ رێکخراوە نێودەوڵەتی و هەرێمییەکان، بەمەبەستی یەکخستن و پەرەپێدانی هەوڵەکان لەسەر ئاستی جیهان."

 

لەبارەی سوودکانی ئەندامبوون لەو کۆمەڵەیە بۆ عێراق، باسم خەشان، ئەندامی لیژنەی دەستپاکی لە پەرلەمانی عێراق بە رووداوی گوت، "ئەندامبوون لەو کۆمەڵەیە تەنیا شتێکی سیمبوولییە و هیچ دەستکەوتێکی ئەوتۆی بۆ عێراق نابێت؛ کاریگەریشی لەسەر هەوڵ و هەنگاوەکان بۆ بنبڕکردنی گەندەڵی نابێت."

 

کۆمەڵەی نێودەوڵەتی بۆ رووبەڕووبوونەوەی گەندەڵی، لە 180 ئەندام پێکدێت، کە 16یان وڵاتی عەرەبین.