لە ئەنبار چوار بازرگانی مادەی هۆشبەر دەستگیرکران

 

 

بەڕێوەبەرایەتیی کاروباری مادەی هۆشبەر لە پارێزگای ئەنبار، ئێوارەی رۆژی شەممە 28-10-2023 لە راگەیێندراوێکدا بڵاویکردەوە، بەپێی بڕیاری دادوەری، لە دەروازەی قائیم بە هاوکاریی لایەنی پەیوەندیدار بۆسەیەکیان داناوەتەوە و تۆڕێکی نێودەوڵەتیی بازرگانیی مادەی هۆشبەریان دەستگیرکردووە، کە لە 4 بازرگانی مادەی هۆشبەر پێکهاتوون.

 

بەگوێرەی راگەیێندراوەکە، چوار بازرگانەکە لە کاتی دەستگیرکردنیاندا مادەی هۆشبەری وەکو حەشیش و حەبی کپتاگۆنیان پێبووە.

 

دەروازەی سنووریی قائیم دەکەوێتە سنووری پارێزگای ئەنبار و هاوسنوورە لەگەڵ سووریا.

 

بەڕێوەبەرایەتیی گشتیی کاروبای مادەی هۆشبەر لە وەزارەتی ناوخۆی عێراق، رۆژی چوارشەممە 25-10-2023 لە راگەیێندراوێکدا بڵاویکردەوە، ئەمساڵ 16 هەزار و 399 کەس بە تاوانی مادەی هۆشبەر دەستگیرکراون، کە 9600یان سزای لەسێدارەدان و زیندانی تاهەتاییان بۆ دەرچووە.

 

بەپێی ئاماری بەڕێوەبەرایەتییەکە، هەر ئەمساڵ دەست بەسەر سێ تۆن و 528 کیلۆ مادەی هۆشبەردا گیراوە.

 

هەروەها باس لەوە دەکات کە لە رووبەڕووبوونەوەکاندا 13 بازرگان کوژران و 11ی دیکە بریندار بوون، لەگەڵ کوژرانی سێ کارمەندی هێزەکانی بەرەنگاربوونەوەی مادەی هۆشبەر و برینداربوونی 23ی دیکە.

 

بەپێی ئامارەکان، لەنێوان ساڵانی 2020 تاوەکو 2022 زیاتر لە 37 هەزار بازرگان و بەکارهێنەری مادەی هۆشبەر دەستگیرکراون.

 

دیارترین ئەو جۆرانەی مادەی هۆشبەر، کە لە عێراق بڵاوبوونەتەوە بریتین لە کریستاڵ، کە زیاتر لە پارێزگاکانی خوارووی عێراق (بەسرە و میسان) بڵاوبووەتەوە و سەرچاوەی هێنانیشی ئێرانە. هەروەها حەشیش لە پارێزگاکانی خوارووی عێراق زیاتر بڵاوە و سەرچاوەکەی ئێران و ئەفغانستانە. لەگەڵ حەبی کەپتاگۆن، کە زیاتر لە پارێزگاکانی رۆژئاوای عێراق بڵاوبووەتەوە و سەرچاوەکەی لوبنان و سووریایە. لە بەغدا، زۆربەی جۆرەکانی هۆشبەر هەن.