فوئاد حوسێن داوای کۆبوونەوەی بەپەلەی رێکخراوی هاریکاری ئیسلامی دەکات

 

ئەمڕۆ هەینی، 30-06-2023، ئەحمەد سەحاف، گوتەبێژی وەزارەتی دەرەوەی عێراق رایگەیاند، د. فوئاد حوسێن، جێگری سەرۆکوەزیران و وەزیری دەرەوە داوای کردووە کۆبوونەوەیەکی بەپەلەی رێکخراوی هاریکاری ئیسلامی بکرێت بۆ تاوتوێکردنی گرنگترین رێوشوێنەکان لەبارەی ئەو سووکایەتییەی بەرامبەر بە قورئانی پیرۆز کراوە لە سوێد.

 

رۆژی چوارشەممە، 28ـی ئەم مانگە و لە یەکەم رۆژی جەژنی قوربان، سەلوان مۆمیکا، پەنابەری عێراقی لە سوێد لە بەردەم مزگەوتی گەورەی ستۆکهۆڵم کۆپییەکی لە قورئانی پیرۆز سووتاند. 

 

ئەو کارەی سەلوان لە عێراق و وڵاتانی دیکەش کاردانەوەی تووندی بەدواداهات، لە سەرکۆنەکردن و بانگکردنی باڵیۆزانی سوێد بەتایبەت لە وڵاتانی عەرەبی و ناڕەزایەتی دەربڕین خۆی بینییەوە، بەڵام لە عێراق تووندترین هەڵوێست روویدا و خۆپێشاندەران ئێوارەی پێنجشەممە چوونە نێو باڵیۆزخانەی ئەو وڵاتە لە بەغدا. 

 

کاردانەوەکان لە بەغدا دژی سووتاندنی قورئانی پیرۆز بەردەوامن و ئەمڕۆ هەینی، سەدان هەزار کەس لە لایەنگرانی سەدر لە بەردەم باڵیۆزخانەی سوێد لە بەغدا کۆبوونەتەوە و دروشم دەڵێنەوە.

 

سەرەڕای کاردانەوەکان؛ بەڵام شەوی پێنجشەممە ئەو پەنابەرە عێراقییە لە لایڤێکدا لە فەیسبووک گوتی، "هەفتەی داهاتوو داوایەک پێشکێش دەکەم بۆ ئەوەی قورئان و ئاڵای عێراق لەبەردەم باڵیۆزخانەی عێراق بسووتێنم."