سوودانی سەردانی مالیکی کرد؛ "بۆ هەواڵپرسینی تەندروستی بووە"

 

لە راگەیێندراوی نووسینگەی راگەیاندنی نووری مالیکی، سەرۆکی هاوپەیمانیی دەوڵەتی یاسادا هاتووە: "سەردانەکە بۆ هەواڵپرسینی تەندروستیی سەرۆکی هاوپەیمانیی دەوڵەتی یاسا بووە، دوای ئەو پشکنینە پزیشکییانەی دوێنێ سێشەممە کردوونی."

 

بەگوێرەی راگەیێندراوەکە، سوودانی "هیوای بەردەوامیی تەندروستی و سەلامەتیی بۆ مالیکی خواستووە" و ستایشی "بەخششە نیشتمانییەکانی و رۆڵی لە چەسپاندنی سەقامگیریی سیاسی لە وڵاتدا کردووە."

 

نووسینگەکەی دەڵێت، مالیکی سەردانەکەی سوودانی "بەرز نرخاندووە" و، "سوپاسی هەموو ئەو کەسانەی کردووە کە پەیوەندییان پێوە کردووە و هەستی باشی خۆیان دەربڕیوە."

 

دوێنێ، ساحب بەزوون حەسناوی، ئەندامی هاوپەیمانیی دەوڵەتی یاسا و کەسی نزیکی نووری مالیکی، سەرۆکی هاوپەیمانییەکە بە تۆڕی میدیایی رووداوی راگەیاند، "سەر لەئێوارەی ئەمڕۆ، نەشتەرگەریی قەستەرە و باڵۆن بۆ بەڕێز نووری مالیکی کرا و نەشتەرگەرییەکە بە سەرکەوتوویی تەواوبوو."

 

ئەمە لەکاتێکدایە، دوانیوەڕۆی دوێنێ، دەنگۆی تووشبوونی سەرۆکی هاوپەیمانی دەوڵەتی یاسا بە جەڵتەی دڵ بڵاوبووەوە، بەڵام نووسینگەکەی روونکردنەوەیەکی بڵاوکردەوە و ئەو دەنگۆیانەی رەتکردەوە.

 

بەگوێرەی نووسینگەکەی، نوورى مالیکى پشکنینى پزیشکى لە نەخۆشخانەى ئیبن بەیتار لە بەغدا کردووە.