سەرۆککۆماری عێراق: پەرلەمان یەکەم ئەرکی دەستووری لە کاتی خۆیدا جێبەجێکرد

 

سەرۆککۆماری عێراق لە پەیامێکی پیرۆزباییدا بۆ سەرۆکی پەرلەمانی عێراق و دوو جێگرەکەی رایگەیاند: "بەڕێز هەیبەت حەلبووسی، سەرۆکی پەرلەمان، پیرۆزبایی هەڵبژاردنتان لێدەکەین وەک سەرۆکی پەرلەمان لە خولی شەشەمیدا؛ هەروەها پیرۆزبایی لە عەدنان فیحان، جێگری یەکەمی سەرۆکی پەرلەمان و فەرهاد ئەترووشی، جێگری دووەمی سەرۆکی پەرلەمان دەکەین؛ هیوای سەرکەوتنتان بۆ دەخوازین لە جێبەجێکردنی ئەرکەکانتان لەپێناو خزمەتکردنی گەلی عێراق بە هەموو پێکهاتەکانییەوە."

 

لەتیف رەشید دەڵێ: "پەرلەمان ئەمڕۆ یەکەم ئەرکی دەستووری لە کاتی دیاریکراوی خۆیدا جێبەجێ کرد، ئەمەش جەخت لە هەستی بەرزی بەرپرسیاریێتیی نیشتمانیی سەرکردەی فراکسیۆنە سیاسییەکان و پەرلەمانتاران دەکاتەوە. لێرەدا ئەرکی قورسی پەرلەمانە بەڕێزەکەتان بۆ دەرکردنی ئەو یاسایانەی پەیوەندییان بە ژیانی خەڵکەوە هەیە، بیردێنینەوە. خەڵک بە لێشاو چوونە سەر سندووقەکانی دەنگدان بۆ هەڵبژاردنی نوێنەرانیان."

 

سەرۆککۆماری عێراق دەڵێ: "رۆڵی چاودێریی ئەنجوومەنە بەڕێزەکەتان کەمتر گرنگ نابێت لە رۆڵی یاسادانانی، چونکە خەڵک چاوەڕێی ئەوەتان لێدەکات رۆڵی چاودێری بە باشترین شێوە جێبەجێ بکەن؛ ناکرێ باس لە سیستمێکی پەرلەمانی و ئەزموونێکی دیموکراسیی راستەقینە بکرێت بەبێ بوونی پەرلەمانێک کە بتوانێت چاودێریی کارەکانی دەسەڵاتی جێبەجێکردن بکات و کەموکوڕییەکان دەستنیشان بکات و سزای سەرپێچیکاران بدات."