بەڕێوەبەری ئاسایشی ئەلیکترۆنی عێراق: ئەم ساڵ چەندین هێرشی ئەلیکترۆنی پووچەڵکراونەتەوە

 

عەمید حەسەن هادی، بەڕێوەبەری ئاسایشی ئەلیکترۆنی عێراق سەبارەت بە پاراستنی داتاکانی هاووڵاتییان و ئاسایشی دیجیتاڵیی عێراق، وردەکاریی نوێی لەسەر پاراستنی گەورەترین بانکی زانیاریی عێراق (کارتی نیشتمانی، پاسپۆرت و ڤیزەی ئەلیکترۆنی) بۆ تۆڕی میدیایی رووداو ئاشکرا دەکات.

 

 

بەڕێوەبەری ئاسایشی ئەلیکترۆنی عێراق پشتڕاستی کردەوە کە لەم ساڵدا چەندین هەوڵی دزەکردن بۆ نێو پلاتفۆرمە دیجیتاڵییەکانی وەزارەتی ناوخۆ هەبوون. 

 

ئەو بەرپرسە گوتی: "هێرشەکانی ئەم ساڵ بەشێک بوون لە هێرشی فراوان و بەردەوامی سەر سیستمی دیجیتاڵیی عێراق، بەڵام لە رێگەی نوێکردنەوەی بەردەوامی سیستمەکان و تاقیکردنەوەی خولیی بۆ دۆزینەوەی کەلێنەکان، توانیمان هێرشەکان پووچەڵ بکەینەوە."

 

چۆن زانیاری ملیۆنان هاووڵاتی دەپارێزرێ؟

 

سەبارەت بەو مەترسییانەی لەسەر داتای کارتی نیشتمانی و پاسپۆرت هەن، عەمید حەسەن هادی ئاماژەی بەوە کرد، وەزارەتی ناوخۆ زنجیرەیەک رێکاری تووندی گرتووەتەبەر.

 

 

کۆدکردنی داتاکان: هەموو زانیارییەکان لە کاتی گواستنەوە و کۆگاکردندا بە تەواوی تەشفیر (Encryption) دەکرێن.

 

چاودێریی 24 کاژێری: لە رێگەی ناوەندی کارە ئەمنییەکان (SOC)، 7 رۆژی هەفتە و 24 کاژێر چاودێریی هەموو داتاکان دەکرێ.

 

بەڕێوەبەری ئاسایشی سایبەری گوتی: "تەنیا ئەو فەرمانبەرانەی مۆڵەتیان هەیە، دەتوانن دەستیان بە داتاکان بگات، ئەویش لە ژێر چاودێرییەکی وردی ئەلیکترۆنییدا."

 

 

بەڕێوەبەری ئاسایشی سایبەری عێراق دەڵێت: "بۆ رێگری لە هەر دەستکاریکردنێکی دەرەکی، پڕۆسەی کۆدکردنی پێشکەوتوو بەکاردەهێنین؛ هەروەها جۆرە دیوارێکی پاراستنی تایبەتمان داناوە کە تایبەتە بە شیکردنەوە و لێکۆڵینەوەی ئەو داواکارییانە کە لە دەرەوەی عێراقەوە دێن، ئەمەش رێگرە لە هەر هێرشێکی دەرەکی."

 

عەمید حەسەن ئاماژە بەوە دەکات: "خولی جیاواز بۆ فەرمانبەران دەکرێتەوە تاوەکو ئاشنای تەکنیکەکانی ئەندازیاریی کۆمەڵایەتی بن و نەبنە کەلێنێک بۆ هاککەرەکان. "

 

بە گوتەی بەڕێوەبەری ئاسایشی سایبەری، وەزارەتی ناوخۆ بڕیاریداوە "ئەنجامی ئەم خولانە ببەستێتەوە بە پلەبەرزکردنەوە و سەرمووچەی فەرمانبەران، ئەمەش وەک هاندانێک بۆ گرنگیدانی زیاتر بە ئاسایشی زانیارییەکان."