وەزارەتی بەرگریی سووریا بنکەی تەنەفی وەرگرتەوە

 

 

ئاژانسی رۆیتەرز لە زاری دوو سەرچاوەی ئەمنییەوە بڵاویکردەوە، ئەمریکا هێزەکانی خۆی لە بنکەی سەربازیی تەنەف لە باشووری رۆژهەڵاتی سووریاوە بۆ ئوردن گواستووەتەوە.

 

هێزەکانی ئەمریکا و هاوپەیمانیی نێودەوڵەتی دژی داعش، لە ساڵی 2016دا بنکەی سەربازیی تەنەفیان لە ناوچەی 55 کیلۆمەتری لە رۆژهەڵاتی حمس، لە نزیک سێگۆشەی سنووریی نێوان سووریا، ئوردن و عێراق دامەزراندبوو.

 

پێنجشەممە 12ی شوباتی 2026، وەزارەتی بەرگریی سووریا لە راگەیێندراوێکدا کە لە هەژمارە فەرمییەکانی خۆی بڵاویکردووەتەوە، ئاماژەی بەوە کردووە کە وەرگرتنەوەی بنکەکە "بە هاوئاهەنگی لە نێوان سووریا و ئەمریکا بووە".

 

وەزارەتەکە ئەوەشی خستووەتەڕوو کە یەکەکانی سوپا "دەستیان بە بڵاوەپێکردنی هێزەکانیان لەسەر سنووری سووریا، عێراق و ئوردن لە بیابانی تەنەف کردووە."

 

هەروەها وەزارەتی بەرگریی سووریا رایگەیاندووە: "هێزەکانی پاسەوانی سنووری سەر بە وەزارەتی بەرگری، لە رۆژانی داهاتوودا دەست بە ئەرکەکانیان دەکەن و لە ناوچەکەدا جێگیر دەبن."