بەڕێوەبەرایەتیی خۆسەر: دوورخستنەوەمان لە چارەسەری سیاسی لە سووریا چارەنووسەکەی شکستهێنانە

 

 

لە راگەیێندراوێکدا بەڕێوەبەرایەتیی خۆسەر پێشوازی لە راگەیێندراوی ئەنجوومەنی ئاسایشی نێودەوڵەتی دەکات، کە لە 10ی ئابدا دەرچووە و تێیدا تاوانەکانی دژی خەڵکی سڤیل لە سوەیدا سەرکۆنە کراون.

 

بەڕێوەبەرایەتیی خۆسەر دەڵێت، راگەیێندراوەکەی ئەنجوومەنی ئاسایش هاوتەریبە لەگەڵ خاڵەکانی رێککەوتنی 10ی ئاداری نێوان دیمەشق و هێزەکانی سووریای دیموکرات، هەروەها لەگەڵ ئەنجامەکانی کۆنفرانسی یەکڕیزیی هەڵوێستی پێکهاتەکانی باکوور و رۆژهەڵاتی سووریا کە لە 8ی ئەم مانگە لە شاری حەسەکە بەڕێوەچوو.

 

بەڕێوەبەرایەتیی خۆسەر باس لەوە دەکات، پابەندبوون بە بڕیاری 2254ی ئەنجوومەنی ئاسایش و بنەماکانی، "چوارچێوەیەکی گشتگیرە و هیچ جێگرەوەیەکی نییە" بۆ گواستنەوەیەکی سیاسیی راستەقینە لە سووریا.

 

لە راگەیێندراوەکەدا هاتووە، "پێویستە بەشداریی هەموو هێزە کاریگەرەکانی سەر زەوی مسۆگەر بکرێت، لەنێویاندا بەڕێوەبەرایەتیی خۆسەر و هێزە سەربازییەکەی، هەسەدە، وەکو لایەنێکی سەرەکیی هاوکێشەی سووریا، بەرەنگاربوونەوەی تیرۆر و پاراستنی سەقامگیری."

 

هەروەها هۆشداری داوە لەوەی "هەر پرۆسەیەکی سیاسی کە ئەو هێزانە دووربخاتەوە کە نوێنەرایەتیی ویستی ملیۆنان سووریایی دەکەن، ئەنجامی خراپی دەبێت."

 

 

• پێکهێنانی دەستەیەکی بەڕێوەبردنی راگوزەری گشتگیر.

 

• راگرتنی ئۆپەراسیۆنە سەربازییەکان و هەڕەشەکان لە هەموو لایەکەوە.

 

• داڕشتنی دەستوورێکی نوێ بە سازان.

 

• پێکهێنانی حکومەتێکی راوگوزەر کە هەموو پێکهاتەکان لەخۆبگرێت.

 

• بەردەوامبوون لە بەرەنگاربوونەوەی تیرۆر.

 

• گەڕانەوەی ئاوارەکان بۆ زێدی خۆیان.

 

• بەڕێوەچوونی هەڵبژاردنێکی ئازاد و بێگەرد لەژێر چاودێریی نەتەوە یەکگرتووەکان.

 

بەڕێوەبەرایەتیی خۆسەر داوای کردووە کە نەتەوە یەکگرتووەکان "رۆڵێکی سەرەکی و کاریگەر" بگێڕێ لە سەرپەرشتیکردنی دیالۆگێکی نیشتمانیی گشتگیر کە هەموو لایەنە سووریاییەکان بەبێ جیاوازی لەخۆبگرێ، بۆ بنیاتنانی "سووریایەکی دیموکراسی، فرەپێکهاتە و یەکگرتوو."

 

لە راگەیێندراوێکی سەرۆکایەتیی ئەنجوومەنی ئاسایش، کە رۆژی یەکشەممە لەلایەن ئەندامانییەوە پەسند کرا، باڵیۆزەکان رایانگەیاند، "زۆر نیگەرانن" لە پێکدادانەکانی ئەم دواییە کە "کوشتنی بەکۆمەڵ"یان تێدا بوو و بوونەهۆی ئاوارەبوونی نزیکەی 192 هەزار کەس.

 

ئەنجوومەنەکە "بە تووندی" سەرکۆنەی ئەو تووندوتیژییەی کرد بەرامبەر خەڵکی سڤیل کرا، داوای لە هەموو لایەنەکان کرد پابەندی رێککەوتنی ئاگربەست بن و پاراستنی دانیشتووانی سڤیل مسۆگەر بکەن.

 

ئەنجوومەنە 15 ئەندامییەکە ئەرکەکانی هەموو لایەنەکانی بەپێی مافەکانی مرۆڤ و یاسای مرۆیی نێودەوڵەتی بیرهێنایەوە، بەتایبەتی جەختی لە ئەرکی "رێزگرتن و پاراستنی" هەموو کارمەندانی پزیشکی و مرۆیی کردەوە.

 

ئەندامانی ئەنجوومەنی ئاسایش داوایان لە هەموو لایەنەکانی سووریا کرد رێگە بە "گەیشتنی تەواو، سەلامەت، خێرا و بێبەربەستی هاوکاریی مرۆیی" بدەن بۆ کۆمەڵگە زیانلێکەوتووەکانی ناوچەی سوەیدا کە زۆرینە دروزن، بە پێی پرەنسیپەکانی مرۆڤایەتی، بێلایەنی و سەربەخۆیی.