ئەنەکەسە: دەستووری نوێی سووریا تووشی شۆکی کردین

 

 

ئەنجوومەنى نیشتمانى کورد لە سووریا (ئەنەکەسە) رۆژی 14ی ئاداری 2024 لە راگەیێندراوێکدا ئاماژەى بەوە داوە، راگەیێندراوى دەستوورى لە سووریا "تووشى شۆکى کردووین" و " جێگەى بێ ئومێدى بووە" کە دوور لە خواستنەکان بووە بۆ بنیاتنانى دەوڵەتى دیموکراسی و لەلایەن کۆمیتەیەکیشەوە ئامادەکراوە کە نوێنەرایەتیی سەرجەم پێکهاتە سیاسی و نەتەوەیی و ئاینییەکانى نەکردووە. 

 

ئەنەکەسە ئاماژەى بەوەداوە، ئەو دەستوورە فرەیی لە سووریا پێشتگوێ خستووە وەک دەوڵەتێکى فرە نەتەوەیی و ئایین و تەنیا ناسنامەى یەک نەتەوەیى لە ناونانى دەوڵەت جێگیر کردووە. 

 

لە بەشێکى دیکەى راگەیێندراوەکەى ئەو لایەنانەى رۆژئاواى کوردستان هاتووە، کە دەستوورەکە سیستمى حوکمى ناوەندى تۆختر کردووە و دەسەڵاتى زۆرى داوەتە سەرۆککۆمار، بەبێ گەرەنتى لە جیاکردنەوەى نێوان دەسەڵاتەکان. 

 

ئەنەکەسە پێیوایە، ئەو دەستوورە هەنگاوێکى دیکەیە بۆ تاکڕەوى لە دەسەڵات. بۆیە بە پێویستی دەزانێت هەڵوێستێک لەلایەن سەرجەم هێزە نیشتمانی و دیموکراسیی و نەتەوەییەکانەوە هەبێت، بۆ ئەوەى چاو بەو دەستوورەدا بخشێنرێتەوە و فرەیی سیاسی و نەتەوەیى تێدا بێتەدى. 

 

13ـی ئادارى 2025 کۆمیتەى پسپۆڕانى راسپێردراو بۆ داڕشتنى راگەیێندراوى دەستوورى سووریا، رەشنووسى دەستوورى رادەستى ئەحمەد شەرع، سەرۆککۆمارى سووریا بۆ قۆناخى راگوزەر کرد. 

 

راگەیێندراوى دەستوورى بۆ ماوەى 5 ساڵە وەک قۆناخى راگوزەر دەبێت، تاوەکو هەڵبژاردن لەو وڵاتەدا دەکرێت.