کۆبوونەوەی هاوپەیمانان و فەرماندەکانی هەسەدە لە دێر حافر کۆتاییهات

 

 

بەگوێرەی زانیارییەکان، لە کۆبوونەوەکەدا هەریەک لە رۆژهەڵات عەفرین، ئەندامی فەرماندەیی گشتیی یەکینەکانی پاراستنی ژنان (یەپەژە) و چیا کۆبانی، ئەندامی فەرماندەیی گشتیی هەسەدە، شانبەشانی فەرماندە باڵاکانی هاوپەیمانیی نێودەوڵەتی بەشدار بوون.

 

هاوکات فەرماندەیەکی هەسەدە لە دێر حافرەوە رایگەیاند، جگە لە ئەندامانی فەرماندەیی گشتی، هەریەک لە جەمیل کۆبانی و سەرخۆبوون کۆبانی، فەرماندەی بەرەی دێر حافر و بەدران چیا کورد، راوێژکاری بەڕێوەبەرایەتیی خۆسەر یاوەری شاندەکە بوون.

 

بەپێی زانیارییەکان، شاندەکەی هاوپەیمانان بە سەرپەرشتیی ئەمریکا بووە و کاروانەکەیان لە 6 زرێپۆش پێکهاتبوو، کە لە شاری تەبقەوە بەرەو دێر حافر بەڕێکەوتبوون.

 

دێر حافر دەکەوێتە رۆژئاوای رووباری فورات و لەژێر کۆنترۆڵی هەسەدەدایە. ئەم سەردانە مەیدانییە و کۆبوونەوەی فەرماندە باڵاکان لە کاتێکدایە، ماوەی چەند رۆژێکە ئەو ناوچەیە لەژێر هەڕەشەی هێرشی سوپای سووریادایە و دیمەشق هەڕەشەی کۆنترۆڵکردنەوەی دەکات.

 

لەلایەکی دیکەوە وەزارەتی بەرگریی سووریا رایگەیاندووە، ماوەی سێ رۆژە لە دێر حافرەوە بەرەو حەلەب رێڕەوێکی مرۆیی بۆ هاووڵاتییان کردووەتەوە، کە ئەو ڕێڕەوە تاوەکو کاژێر 5:00ـی ئێوارەی ئەمڕۆ کراوە دەبێت.