یەکەکانی وەزارەتی ناوخۆی سووریا چوونە ناو شاری رەققە

 

رۆژی یەکشەممە 18-01-2026 وەزارەتی ناوخۆی سووریا لە راگەیێندراوێکدا ئاماژەی بەوە کردووە: "ئەم هەنگاوە لە چوارچێوەی هەوڵە بەردەوامەکانی وەزارەتەکەدایە بۆ کۆنتڕۆڵکردنی دۆخی ئەمنی لە شار و ناوچە جیاوازەکان و دابینکردنی ژینگەیەکی ئارام بۆ هەموو خەڵک".

 

ئەوە لەکاتێکدایە، هەر ئەمرۆ رۆژی یەکشەممە ئەحمەد شەرع، سەرۆکی قۆناخی راگوزەری سووریا  و مەزڵووم عەبدی، فەرماندەی گشتیی هێزەکانی سووریای دیموکرات (هەسەدە)، رێککەوتنێکیان بۆ ئاگربەست و تێکەڵکردنی تەواوەتی واژۆ کرد، بەپێی رێککەوتنەکە، دەبێت هەر دوو پارێزگەی دێرەزوور و رەققە لە رووی کارگێڕی و سەربازییەوە دەستبەجێ رادەستی حکومەتی سووریا بکرێنەوە. ئەم رادەستکردنەوەیە سەرجەم دامەزراوە مەدەنی و بنکە خزمەتگوزارییەکانی ئەو دوو پارێزگەیەش دەگرێتەوە.

 

ئەم گۆڕانکارییانە دوای 12 رۆژ لە ئاڵۆزیی سەربازی دێن کە لە شاری حەلەب دەستیپێکرد و بووە هۆی ئاوارەبوونی زیاتر لە 159,000 کەس. لە چەند روژی رابردوودا، سوپای عەرەبیی سووریا کۆنتڕۆڵی شاری تەبقە، بەنداوی فورات و گەورەترین کێڵگەی نەوتی وڵاتەکە، (عومەر)ـی لە دێرەزوور کرد، ئەمەش دوای کشانەوەی هێزەکانی هەسەدە لەو ناوچانە.

 

رێککەوتنە 14 بڕگەییەکەی نێوان دیمەشق و هەسەدە، تەنیا رادەستکردنەوەی شارەکان ناگرێتەوە، بەڵکو بڕیاردراوە سەرجەم دامەزراوە مەدەنییەکانی حەسەکەش تێکەڵی ناو دەوڵەتی سووریا بکرێن. حکومەتی دیمەشقیش دانی بە زمانی کوردیدا وەک "زمانێکی نیشتمانی" ناوە و وەڵاتینامە دەداتە کوردانی بێ وەڵاتینامە.