کاروباری ئاوارە و پەنابەرانی خۆسەر: زیاتر لە 27 هەزار لە کەسوکاری چەکدارانی داعش لە کەمپەکاندان

 

شێخموس ئەحمەد، هاوسەرۆکی کاروباری ئاوارە و پەنابەرانی بەڕێوەبەرایەتیی خۆسەر، ئەمڕۆ یەکشەممە بە تۆڕی میدیایی رووداوی گوت، "لە کەمپەکانی هۆل و رۆژ 27 هەزار و 146 کەس لە ماڵباتی چەکدارانی داعش دەژین، کە دەبنە 7 هەزار و 604 خێزان".

 

بەگوێرەی ئاماری کاروباری ئاوارە و پەنابەرانی بەڕێوەبەرایەتیی خۆسەر، لەو ماڵباتانەی داعش کە لەو دوو کەمپەی رۆژئاوای کوردستاندان، 866 خێزانی عێراقیی هەن، 850 یان لە کەمپی هۆلن و 16یان لە کەمپی رۆژ، کە کۆی گشتییان 3 هەزار و 275 کەسن، زۆرینەیان کە 3 هەزار و 200 کەسە لە کەمپی هۆلن و 75 یان لە کەمپی رۆژ".

 

لە ئاماری کاروباری ئاوارە و پەنابەرانی بەڕێوەبەرایەتیی خۆسەردا ئاماژە بەوە کراوە، بەگشتی لە کەمپی هۆل 6 هەزار و 846 خێزان هەن، کە دەبنە 24 هەزار و 384 کەس. زۆرینەیان سووریایین، کە 4 هەزار و 123 خێزانن و پێکدێن لە 14 هەزار و 902 کەس".

 

دووەم زۆرترین دانیشتووی کەمپی هۆل بیانییەکانن، کە هەزار و 873 خێزانن و پێکدێن لە 6 هەزار و 284 کەس، بەدوای ئەوانیشدا عێراقییەکانن، کە 850 خێزانن و پێکدێن لە 3 هەزار و 200 کەس.

 

کەمپی رۆژ یەکێکی دیکە لەو کەمپانەی رۆژئاوای کوردستان کە ماڵبات و کەسوکاری چەکدارانی داعشی تێدایە، بە گوێرەی ئامارەکە، تاوەکو ئەمڕۆ 18-01-2026 لەو کەمپەدا 758 خێزان هەن، کە پێکدێن لە 2 هەزار و 762 کەس.

 

ئەوانەی لە کەمپی رۆژدا نیشتەجێن سووریایی، بیانی و عێراقین. بەگوێرەی ئامارەکە، زۆرترینیان بیانین، کە 731 خێزانن و پێکدێن لە 2 هەزار و 167 کەس، بەدوای ئەواندا سووریاییەکانن، کە 520 کەسن و 11 یان خێزانن، هەروەها عێراقییەکانی کەمپی رۆژ 16 خێزانن و پێکدێن لە 75 کەس.

 

هاوسەرۆکی کاروباری ئاوارە و پەنابەرانی بەڕێوەبەرایەتیی خۆسەر بە تۆڕی میدیایی رووداوی گوت: "کەمپەکان تاوەکو ئەمڕۆ ناوەوەیان لەلایەن ئاسایشی نێوخۆ و دەرەوەشی لەلایەن هەسەدە و هێزەکانی هاوپەیمانانەوە دەپارێزرێت".

 

بە گوتەی شێخمووس ئەحمەد، "ئەو زیندانییانەی داعشیان تێدا بەند کراوە لەلایەن هەسەدە و هێزەکانی هاوپەیمانانەوە دەپارێزرێن".

 

هاوسەرۆکی کاروباری ئاوارە و پەنابەرانی بەڕێوەبەرایەتیی خۆسەر گوتی، "بەهۆی هێرشەکانی چەکدارەکانی تەحریر شام [بەشێکی سەرەکین لە حکومەتی کاتیی سووریا]وە مەترسی جیدیی لەسەر کەمپەکان و زیندانەکانی چەکدارانی داعش دروست بووە، چونکە ئەوانەش هێرش دەکەن هەر وەکو داعشن."

 

شێخ مووس ئەحمەد گوتی، "هەر رووداوێکی نەخوازراو لە کەمپەکان رووبدات هاوپەیمانیی نێودەوڵەتی بەرپرسیارن، چونکە تاوەکو ئێستا بێدەنگن".