هەسەدە داوای چەکهەڵگرتنی گشتی لە گەنجانی هەر چوار پارچەی کوردستان دەکات

 

هەسەدە لە راگەیێندراوەکەدا ئاماژەی بەوە کردووە، لە 6ـی کانوونی دووەمەوە ناوچەکانیان و گەلەکەیان رووبەڕووی هێرشی "دڕندانە و دڕندانە" بووەتەوە. هەسەدە دەڵێت: "ئەمرۆ دەوڵەتی تورکیا و چەتەکانی کە خاوەن بیری داعشن، هێرشەکانیان بۆ سەر گەلەکەمان چڕ کردووەتەوە، بەو خەیاڵەی کە بتوانن ئیرادەی ئێمە بشکێنن."

 

 

فەرماندەیی گشتیی هەسەدە لە پەیامەکەیدا یادی بەرخۆدانی ساڵی 2014ـی کۆبانێی کردەوە و رایگەیاند: "وەک چۆن لە ساڵی 2014 کۆبانێمان کردە گۆڕستان بۆ ئەو داعشەی تورکیا پشتیوانی دەکرد، ئەمرۆش بە هەمان ئیرادەوە رایدەگەیێنین کە شارەکانمان لە دێرکەوە تاوەکو حەسەکە و کۆبانێ، دەکەینە گۆڕستان بۆ خاوەن زەینییەتە نوێیەکانی داعش کە لە لایەن تورکیاوە ئاراستە دەکرێن."

 

 

هەسەدە بانگەوازێکی گشتی ئاراستەی هەموو گەنجانی کورد (کوڕان و کچان) لە رۆژئاوا، باکوور، باشوور و رۆژهەڵاتی کوردستان و تەنانەت ئەوانەی لە ئەورووپان کرد، کە یەکبگرن و سنوورەکان تێکبشکێنن و بەشداری لەم بەرخۆدانەدا بکەن. لە راگەیێندراوەکەدا هاتووە: "ئەمرۆ رۆژی کەرامەت و بەرپرسیارێتیی مێژووییە؛ ئێمە جارێکی دیکە نیشانی دەدەین کە ئیرادەی گەلان لە هەر جۆرە داگیرکارییەک بەهێزترە."

 

ئەم بانگەوازە تووندەی هەسەدە لە کاتێکی یەکجار مەترسیداردا دێت. هەر ئەمڕۆ رۆژی دووشەممە 19-01-2026، بارودۆخی ئەمنی لە سووریا بەرەو تەقینەوە رۆیشتووە؛ هەسەدە رایگەیاند کە کۆنترۆڵی زیندانی شەدادی لە باشووری حەسەکە لەدەستداوە و "هەزاران داعش" لە لایەن گرووپە چەکدارەکانی سەر بە دیمەشقەوە ئازاد کراون. هەروەها پێکدادانی سەخت لە دەوروبەری زیندانی ئەقتان لە رەققە بەردەوامە و هەسەدە دیمەشق بە "تاوانی جەنگ" و سەربڕینی شەڕڤانان تۆمەتبار دەکات.