دوای شەپۆلێکی تووڕەیی؛ ئەو سەربازەی سووکایەتی بە "کەزیی" کچە شەڕڤانێک کردبوو بیانوو دەهێنێتەوە

 

ئەو کەسەی لە ڤیدیۆکەدا بە گاڵتەجاڕییەوە کەزییەکەی بەدەستەوە گرتبوو، ناوی (رامی دەهش)ـە. پێشتر چەکداری ئۆپۆزیسیۆنی سووریا بووە و ئێستاش لە ناو سوپای عەرەبیی سووریا کار دەکات. 

 

رامی کە باوکی پێنج کچە، بەو رەفتارەی برینێکی قووڵی لە دڵی ملیۆنان کورد دروست کرد، ئەمەش وایکرد ژنان و کچانی کورد لە هەڵمەتێکی وێنەگرتندا بە هۆندنەوەی کەزییەکانیان، وەڵامی ئەو سووکایەتییە بدەنەوە.

 

 

دوای ئەو شەپۆلە گەورەیەی سەرۆکۆنەکردن، رامی دەهش لە روونکردنەوەیەکی نوێدا هەوڵ دەدات خۆی لەو رەفتارە بدزێتەوە و دەڵێت: "سەرم سوڕما کە بینیم ڤیدیۆکە بووەتە ترێند. ئەو قژەی لە ڤیدیۆکەدا دەردەکەوێت قژی سروشتی نییە و دەستکردە (بارۆکە)، تەنیا بۆ گاڵتە و گەپ ئەو کارەم کردووە".

 

 

دەهش لە قسەکانیدا دەڵێت: "لە تەنیشت چێشتخانەیەک دەڕۆیشتم، ئەو قژە دەستکردە لەسەر مێزێک دانرابوو، هەڵمگرت و خاوەن چێشتخانەکە کە هاوڕێمە وێنەی گرتم. ئەو پێی گوتم بڵێ قژی هەڤاڵە (شەڕڤان)، منیش بۆ گاڵتە گوتم و ئەویش بڵاوی کردەوە، بەبێ ئەوەی بزانین ئەم هەرا و زەنایەی لێ دەکەوێتەوە."

 

ئەم سەربازەی سوپای سووریا لە کۆتایی پەیامەکەیدا، هەوڵ دەدات وێنەی خۆی وەک "بکوژ و تاوانبار" لای خەڵک بسڕێتەوە و جەخت دەکاتەوە کە مەبەستی سووکایەتی نەبووە، لە کاتێکدا رەفتارەکەی لەسەر ئاستی کوردستان و ناوچەکە وەک "تاوانێکی ئەخلاقی و بێڕێزی بەرامبەر بە پیرۆزییەکانی مرۆڤ" ناوزەند کرا.