سەرایا ئەنسار و سوننە بەرپرسیارێتی خۆی لە تەقینەوەکەی دیمەشق راگەیاند

 

22ی حوزەیران، تەقینەوەیەک لەنێو کەنیسەی سانت ئیلیاس لە ناوچەی دوێلعەی دیمەشق روویدا. بە گوێرەی وەزارەتی تەندروستیی سووریا، لە تەقینەوەکەدا 25 کەس کوژران و 63ـی دیکەش بریندار بوون. 

 

ئەمڕۆ سێشەممە، 24ی حوزەیرانی 2025، گرووپی سەرایا ئەنسار و سوننە لە راگەیێندراوێکدا لە تەلەگرام بڵاویکردەوە، ئەندامێکیان "لەنێو کەنیسەی سانت ئیلیاس لە ناوچەی دوێلعەی دیمەشق خۆی تەقاندەوە". 

 

سەرایا ئەنسار و سوننە گرووپێکی چەکدارە و خۆی بە پاڵپشتیکاری سوننە دادەنێ. گرووپەکە دەڵێ، لە سووریا و لوبنان چالاکە. 

 

ئەو گرووپە تۆمەتبار دەکرێت بەوەی بەشداربووە لە هێرشەکانی ئایاری ئەم ساڵ بۆ سەر عەلەوییەکان لە پارێزگاکانی لازقییە و تەرتوسی سووریا. بە گوێرەی سەرچاوە خۆجێییەکانی سووریا، لەو هێرشانەدا هەزار و 700 کەس کوژران.