هەسەدە: گرووپە چەکدارەکانی دیمەشق هێرشیانکردە سەر دەوروبەری کۆبانی

 

 

رۆژی یەکشەممە، 25ی کانوونی دووەمی 2026، ناوەندی راگەیاندنی هەسەدە بڵاویکردەوە، "سەرەڕای رێککەوتنی درێژکردنەوەی ئاگربەست، گرووپەکانی سەر بە دیمەشق هێرشیان کردە سەر گوندەکانی شێخلەر/شیوخ و زێرک لە رۆژئاوای شاری کۆبانی و جەلەبیە لە باشووری رۆژهەڵاتی شارەکە".

 

ئەو هێرشەی سوپای عەرەبی سووریا بۆ سەر دەوروبەری کۆبانێ لە کاتێکدایە دوێنێ هەردوولا رێککەوتن کە ئاگربەست بۆ 15 رۆژ درێژبکەنەوە. ئاگربەستی پێشوو بۆ چوار رۆژ بوو. 

 

لە رۆژی 6ی ئەم مانگەوە هێزەکانی سەر بە حکومەتی سووریا دەستیان بە هێرشەکانیان بۆ سەر گەڕەکە کوردییەکانی شاری حەلەب و ناوچەکانی دیکەی ژێر کۆنترۆڵی هەسەدە کرد. هەفتەی رابردووش، بەهۆی ئەو هێرشانەوە کەمپێکی کەسوکاری چەکدارانی داعش و ژمارەیەک گرتووخانە کەوتنە دەست ئەو هێزانەکە ژمارەیەکیان و بەشێک لە کەسوکاریان توانیان هەڵبێن.