تورکیا ئۆپەراسیۆنەکەی لەدژی حکومەتی سووریا ناودەنێت "قەڵخانی بەهار"

 

خولوسی ئاکار وەزیری بەرگری تورکیا رایگەیاند، ئۆپەراسیۆنی "قەڵخانی بەهار" کە لەدوای هێرشەکەی رۆژی پێنجشەممەی رابردوو27ی شوبات بۆ سەر سەربازەکانی تورکیا لە ئیدلب دەستیپێکردووە، سەرکەوتووانە بەردەوامە و تاوەکو ئێستا، فڕۆکەیەکی بێفڕۆکەوان، 8 هەلیکۆپتەر، 103 تانک، 72 تۆپ، 3 سیستەمی بەرگریی ئاسمانی سوپای سووریا تێکشکێنراون و 2 هەزار و 212 سەربازی سووری-ش کوژراون. 

 

خولوسی ئاکار ئاماژەی بەوەدا، نیازیان نییە لە سووریا رووبەڕووی رووسیا ببنەوە، بەپێچەوانەوە دەیانەوێت "کۆتایی بهێنن بەو کۆمەڵکوژیی و تووندئاژۆییەی سووریا ئەنجامی دەدات و مەبەستیانە رێگری لە کۆچی خەڵکی ناوچەکە بگرن".  

 

ئاکار دەڵێ، چاوەڕوانیمان لە رووسیا ئەوەیە تواناکانی خۆی بەکار بهێنێ بۆ راگرتنی هێرشەکانی حکومەتی سووریا و گەڕانەوەی بۆ سنوورەکانی رێککەوتنی سۆچی.

 

وەزیری بەرگری تورکیا ئاماژەی بەوەدا، با کەس گومانی لەوە نەبێت کە لە چوارچێوەی مافی بەرگری رەوا وەڵامی ئەو هێرشانە دەدەنەوە کە دەکرێنە سەر خاڵەکانی چاودێری و سەرنگەرەکانیان لە سووریا.