هاوسەرۆکی دەم پارتی: پێویستمان بە گەڕاندنەوەی متمانەیە

 

 

پاشنیوەڕۆی ئەمڕۆ هەینی 3ی ئایاری 2024، تولای هاتیمئۆغوڵڵاری و تونجەر باکرهان، هاوسەرۆکانی دەم پارتی سەردانی ئۆزگور ئۆزەل، سەرۆکی جەهەپەیان لە بارەگای سەرەکیی پارتەکە لە ئەنقەرە کرد و دوای دوو کاژێر کۆبوونەوە، کۆنگرەیەکی رۆژنامەڤانیی هاوبەشیان رێکخست.

 

هاوسەرۆکانی دەم پارتی جەختیان لە هاوئاهەنگی، کۆبوونەوە و دیداری بەردەوامیان لەگەڵ بەشێک لە پارتە ئۆپۆزیسیۆنەکانی تورکیا کردەوە؛ بەشێکی کۆبوونەوەکەیشیان تایبەت بوو بە پرسی هەمواری دەستووری تورکیا.

 

سەرۆکی جەهەپە لەبارەی کۆبوونەوەکەی رۆژی پێنجشەممەی لەگەڵ رەجەب تەیب ئەردۆغان، سەرۆککۆماری تورکیا و سەرۆکی ئاکپارتی بە رۆژنامەڤانانی راگەیاند، لە کۆبوونەوەکەیدا پێشنیازی دامەزراندنی وەزارەتی بوومەلەرزەی کردووە.

 

لەبارەی هەوڵەکانی تایبەت بە هەمواری دەستووری تورکیا، ئۆزگور ئۆزەل رایگەیاند، "هەڵوێستمان روونە. دەستووری ئێستا کاری پێناکرێت و دەسەڵات خۆی پابەندی دەستوور نییە و رێزی لێ ناگرێت. ئەگەر رێز لە دەستوور نەگیرێت، پێویست بە هەموارکردن یان سەرلەنوێ داڕشتنەوە ناکات."

 

تولای هاتیمئۆغوڵڵاریش گوتی، پێویستیان بە بەرەیەکی بەهێز و بوێری ئۆپۆزیسیۆنە کە رێگری "لە کارە نادەستوورییەکان بکات و بتوانێت رۆڵ بگێڕێت و چارەسەر بخاتەڕوو."

 

لەبارەی هەمواری دەستووری تورکیاشەوە تولای هاتیمئۆغوڵڵاری رایگەیاند، "بەر لە هەموارەکە پێویستمان بە متمانە هەیە. دەسەڵات خۆی هۆکار بووە لە نەبوونی متمانە و لە سەرجەم بۆنەکاندا ئەمەی بە زەقی سەلماندووە و ئەزموونەکانی پێشتریش هەمان شتمان پێ دەڵێن. بۆیە پرسێکی گرنگی وەک هەمواری دەستوور یان سەرلەنوێ داڕشتنەوەی پێویستی بە زەوینەسازییەکی زۆر هەیە بۆ ئەوەی متمانە هەبێت."