باکووری کوردستان لە 8 مانگدا 7.7 ملیار دۆلار هەناردەی هەبووە

 

ئەمڕۆ چوارشەممە 3ـی ئەیلوولی 2025، ئەحمەد فیکرەت کیلەچی، سەرۆکی GAİB، رایگەیاند: "لە ماوەی 8 مانگدا، هەناردەمان 2.6٪ بەرزبووەتەوە و گەیشتووەتە 7.7 ملیار دۆلار، بەڵام لە مانگی ئابدا داکشان لە هەناردەمان هەبووە."

 

کیلەچی ئاماژەی بەوەدا، ئاستی هەناردەی دیلۆک لە 8 مانگی ئەم ساڵدا، 0.6٪ زیادیکردووە و گەیشتووەتە 6.5 ملیار دۆلار، بەڵام لە ئاستەکەیان رازی نین و دەشڵێن، ئەوەی ئەوان دەیانەوێت نەپێکاوە.  گوتیشی: "ئابووریی تورکیا لە چارەکی دووەمدا بەرێژەی 4.8٪ گەشەی کردووە، بەڵام کەمبوونەوەی هەناردەی خاوێن کە کاریگەری نەرێنی لەسەر گەشە هەبووە، جێگەی سەرنجە. بەشداری ئەرێنی هەناردە لە گەشەی ئابووریدا، بۆ ئابووریی تورکیا و پیشەسازانی تورکیا زۆر گرنگە."

 

کیلەچی باسی لەوەشکرد، وڵاتانی رۆژهەڵاتی نێوەڕاست بە رێژەی 39٪ لە پێشەوەی وڵاتانی هاوردەکارن.

 

ئەوەشی خستەڕوو کە "وڵاتانی ئەفریقا بە رێژەی 16.6٪ لە پلەی دووەمن و وڵاتانی یەکێتیی ئەورووپا بە رێژەی 16.3٪ لە پلەی سێیەمدان. هەناردە بۆ 197 وڵات ئەنجامدراوە، لەوانەش عێراق، ئەمریکا، سووریا، بەریتانیا، ئیتاڵیا، ئەڵمانیا، سعودیە، لیبیا، ئێران و جیبۆتی لە پێشەوەی ئەو وڵاتانەن کە زۆرترین هەناردەیان بۆ کراوە."

 

سەرۆکی یەکێتییەکە راشیگەیاند، بەرهەمەکانی وەک فەرش، بەرهەمە شیرینییەکان، پلاستیک، بەرهەمەکانی قوماش و داو، زەیتە رووەکییەکان، بەرهەمەکانی ئاش، بەرهەمەکانی دار و دارستان، خۆراکی ئامادەکراوی دیکە، سابوون و پاککەرەوەکان، زۆرترین بەرهەمی هەناردەکراو بوون لە ناوچەکەدا."

 

یەکێتیی هەناردەکارانی باشووری رۆژهەڵاتی ئەنادۆڵ (GAİB) ساڵی 1984 دامەزراوە و بەشێکە لە یەکێتیی هەناردەکارانی تورکیا. ناوەندەکەی دیلۆکی باکووری کوردستانە و هەریەک لە پارێزگاکانی مەرەش، مێردین، مەلەتێ، ئامەد، رووداو، سەمسوور، کلیس، شرنەخ لەخۆ دەگرێت.