ئەردۆغان: لە 21 ساڵدا 17 سەرکەوتنمان لە هەڵبژاردنەکاندا بەدەستهێناوە

ئێوارەی ئەمڕۆ پێنجشەممە، 6ـی تەممووزی 2023، ره‌جه‌ب ته‌یب ئەردۆغان لە کاتی بەشداریکردنی لە کۆبوونەوەی فراوانی سەرۆکی لقی رێکخستنه‌كانی ئاکپارتی لە پارێزگاکانی تورکیا و باکووری کوردستان، کە لە بارەگای سەرەکیی ئاکپارتی لە ئەنقەرە بەڕێوەچوو، گوتارێکی پێشکێشکرد.

 

ئەردۆغان لە گوتارەکەیدا باسی لەوە کرد بە پشتیوانیی گەل لە رۆژانی 14 و 28ـی ئایاردا تەنیا سەرکەوتنیان لە دوو هەڵبژاردندا بەدەست نەهێناوە کە جیاوازیی نێوانیان هەر دوو هەفتە بووە، بەڵکو لە هەمان کاتدا "شەرەف و شکۆ"ی دیموکراسیی تورکیایان رزگار کردووە و رایگه‌یاند: "وەک ئاک پارتی، شانازی دەکەین کە لە 21 ساڵی رابردوودا 17 سەرکەوتنمان لە هەڵبژاردنەکاندا بەدەستهێناوە. بێگومان ئەمە ژمارەیەکی پێوانەییە و شکاندنی ئەستەمە. ئەمە سەرکەوتنێکی شکۆمەندانەیە کە هێشتا هیچ بزووتنەوە و هاوپەیمانییەکی سیاسی دیکەی جیهان بەدەستی نەهێناوە".

 

سه‌رۆکكۆماری توركیا ئاماژەی بەوە کرد، دەنگی پارتەکەیان کەمیکردووە، لەبەرئەوە ناتوانن ئەوە نادیدە بگرن کە رێژەی دەنگەکانیان لە ژمارەیەک لە شارەکان بۆ هەڵبژاردنی پەرلەمان و سەرۆکایەتیی کۆمار بەپێی پێویست نەبووە و گوتی، "پارێزگا بە پارێزگا و سندووق بە سندووق لە سەرچاوەی هەموو ئەو کێشانە دەکۆڵینەوە و دوای راوێژ و دەستنیشانکردنی سەرچاوەکان، بەخێرایی دەستوەردان دەکەین و چارەسەریان دەکەین".

 

ره‌جه‌ب ته‌یب ئەردۆغان، چاوی بڕییە هەڵبژاردنی شارەوانییه‌كان و رایگەیاند: "لە 31ی ئاداری 2024دا، بەو ئاراستە خراپە دەڵێین بووەستە، ئەو شارانەمان بەتایبەتی ئیستەنبووڵ و ئەنقەرە کە چوار ساڵە خزمەت ناکرێن، ئاشنایان دەکەینەوە بە سیاسەتی خزمەت و کارکردن".

 

هەروەها ئەردۆغان ئاشكرایكرد، وەکو ئەوەی لە مەیدانەکاندا بەڵێنیان داوه‌، کەمترین مووچەی مووچەخۆران بەرز دەکەنەوە و گوتی: "تێکڕای مووچە دەگەیێنینە 25 هەزار و 15 لیرە. رێنمایی پێویستم داوەتە وەزارەتە پەیوەندیدارەکان بۆ چاککردنی مووچەی خانەنشینی. جێگری سەرۆککۆمار و وەزیرە پەیوەندیدارەکان، لەمبارەیەوە دەستیان بە کارکردن کردووە".