پەرلەمانتارێکی دەم پارتی داوای گەرەنتیی دەستووری بۆ زمانی کوردی دەکات
رووداو دیجیتاڵ
لە سەروبەندی ئامادەکارییەکان بۆ 15ی ئایار، کە رۆژی زمانی کوردییە لە باکووری کوردستان و تورکیا، پەرلەمانتارێکی دەم پارتی پێشنیازێکی پێشکێشی پەرلەمان کردووە. گونەش داوای گەرەنتیی دەستووری بۆ زمانی کوردی دەکات؛ هەروەها داوای لێکۆڵینەوەی لە ئاستەنگە یاسایی و دیفاکتۆکانی بەردەم بەکارهێنانی زمانی کوردی لە کاروباری گشتی، یاسایی و کولتوورییەکان دەکات.
بێریتان گونەش، پەرلەمانتاری پارتی یەکسانی و دیموکراسی گەلان (دەم پارتی) لە بازنەی مێردین پێشنیازێکی پێشکێشی سەرۆکی پەرلەمانی تورکیا کردووە بۆ لێکۆڵینەوە لە ئاستەنگەکانی بەردەم بەکارهێنانی زمانی کوردی لە کاروباری گشتی، یاسایی و کولتوورییەکان.
پێشنیازەکە بەگوێرەی مادەی 98ی دەستوور و مادەکانی 104 و 105ی پەیڕەوی ناوخۆی پەرلەمان پێشکێش کراوە.
پێشنیازەکە باس لەوە دەکات کە زمانەکان تەنیا ئامرازی پەیوەندیکردن نین، بەڵکو هەڵگری یادەوەری مێژوویی و ناسنامەی کولتووری و بوونی کۆمەڵایەتین؛ ئاماژە بەوە دەکات کە زمانی کوردی ساڵانێکی زۆرە ئامانجی سیاسەتی نکۆڵیکردن، قەدەخەکردن و جیاکارییە و لە زۆر بواردا ئاستەنگەکان بەردەوامن، ئیدی لە پەروەردە و خزمەتگوزارییە گشتییەکانەوە بیگرە تاوەکو بەرهەمهێنانی کولتووری و میدیا.
لەو پێشنیازەدا ئاماژە بەوە کراوە کە مافی خوێندن بە زمانی دایک و دەستڕاگەیشتن بە خزمەتگوزارییە گشتییەکان سەرەڕای ڕێککەوتننامە نێودەوڵەتییەکان و بنەمای دەستووری یەکسانی، جێبەجێ ناکرێ و هەرچەندە دان بە بوونی زمانی کوردیدا دەنرێ، بەڵام لە رووی دەستوورییەوە گەرەنتی نەکراوە.
لە پێشنیازەکەدا جەخت لەسەر پێویستی هەنگاوی هەمیشەیی سەبارەت بە پاراستن و گەشەپێدانی زمانی کوردی کراوەتەوە و ئاماژە بەوە کراوە کە پرسی زمان پێکهاتەیەکی بنەڕەتییە لە چارەسەرکردنی پرسی کورد.
15ی ئایار لەساڵی 2006ەوە وەک رۆژی زمانی کوردی لە باکووری کوردستان و تورکیا دیاری کراوە، بە ئامانجی پەرەپێدان، پاراستن و بەرزڕاگرتنی زمان و ئەدەبی کوردی.
ئەم کاتە یادی دەستپێکردنی گۆڤاری هاوار لە 15ی ئایاری 1932 دەکاتەوە، کە یەکەم گۆڤاری کوردییە لە دیمەشق بە بەکارهێنانی ئەلفوبێی لاتینی، لە لایەن جەلادەت عەلی بەدرخان دەرچووە.