تەقینەوە لە کارگەیەکی تەقەمەنی لە ئەنقەرە روویدا و 5 کەس گیانیان لەدەستدا

 

تەقینەوەکە کاژێر 08:45 خولەکی بەیانی ئەمڕۆ شەممە 10ی حوزەیرانی 2023 لە کارگەیەکی تەقەمەنی و بەرهەمهێنانی کەرەستەی مووشەک سەر بە دەستەی پیشەسازیی ئامێر و کیمیایی تورکیا MKE لە ناوچەی تاتلیجە سەر بە شارۆچکەی ئێلماداغی لە ئەنقەرە روویدا. 

 

بەپێی راگەیێندراوی وەزارەتی بەرگریی تورکیا، تەقینەوەکە لە بەشی بەرهەمهێنانی دینامیت روویداوە و لە ئەنجامدا پێنج کرێکار گیانیان لەدەستداوە. 

 

ڤاسیب شاهین، پارێزگاری ئەنقەرە بە رۆژنامەڤانانی تورکیا راگەیاند، "کاژێر 08:45 خولەک لە بەشی بەرهەمهێنانی دینامیت، بەهۆی کارلێکی کیماییەوە تەقینەوەکە روویداوە. بەهۆی بەهێزی تەقینەوەکە، بەشێکی کارگەکە رووخاوە و پێنج کرێکار لە ژێر داروپەردووەکاندا گیانیان لەدەستداوە. لێکۆڵینەوە دەستیپێکردووە و ئەنجامی لێکۆڵینەوەکەش بۆ رای گشتیی ئاشکرا دەکرێت." 

 

دوای رووداوەکە، ژمارەیەکی زۆر ئەمبووڵانس و تیمی فریاگوزاریی چوونەتە شوێنی رووداوەکە.  

 

ئەم کارگەیە پێداویستییەکانی تەقەمەنی و کەرەستەی مووشەک و رۆکێت بۆ هەردوو وەزارەتیی ناوخۆ و بەرگریی تورکیا دابین دەکات.