سەعادەت داوای کۆبوونەوەیەکی نائاسایی پەرلەمان بۆ بڕیارەکەی پەکەکە دەکات

 

ئەمڕۆ چوارشەممە 14ـی ئایاری 2025، مەحموود ئاریکان، سەرۆکی پارتی سەعادەت لە کۆبوونەوەی هەفتانەی فراکسیۆنی یەنی یۆڵ، کە فراکسیۆنێکی هاوبەشی پارتی سەعادەت، پارتی ئایندە و پارتی دەڤایە، گوتارێکی پێشکێش کرد. 

 

مەحموود ئاریکان، لە بەشێکی گوتارەکەی داوای کرد کۆبوونەوەیەکی نائاسایی لە پەرلەمان رێکبخرێت و تایبەت بێت بە بڕیارەکەی پەکەکە و پرۆسەی چارەسەری. 

 

سەرۆکی پارتی سەعادەت گوتی: "ئاکپارتی و مەهەپە پرۆسەکە لە پشت دەرگا داخراوەکاندا بەڕێوەدەبەن. پەرلەمانتاران بە پەرلەمانتارانی ئاکپارتیشەوە زانیارییان لەبارەی پرۆسەکەوە نییە. پێویستە پەرلەمانتاران ئاگادار بن بەوەی چۆن هەنگاو نراوە و سەرچاوەی یەکەم هەنگاوی ئەم پرۆسەیە چۆن بووە و ئێستا لە چ قۆناخێکدان و بۆ داهاتوو میکانیزمی بەڕێوەبردنی پرۆسەکە چۆنە."

 

مەحموود ئاریکان، رەخنەی لە دەسەڵات گرت، کە رای گشتی لە پرۆسەکە ئاگادار ناکاتەوە و گوتی: "پەرلەمانتاران و سیاسەتڤانانیش لە میدیا و راگەیاندنەکان زانیاری وەردەگرن. دەکرێ بۆ ئەوەی بزانین چی روویداوە و ئاگاداری پێشهاتەکان بین، چاومان لە گۆشەی عەبدولقادر سێلڤی (نووسەرێکی نزیک لە دەسەڵات) بێت؟ ئەگەر دەسەڵات راست دەکات، دەبێ هەموو هەنگاوەکان بە شەفافی بەڕێوەببات و هەمووان ئاگادار بکاتەوە، بەپێچەوانەوە گومان دروست دەکات." 

 

سەرۆکی پارتی سەعادەت هەروەها دەڵێت: "ناکرێت گفتوگۆی ئاشتی لە رۆما، ئۆسلۆ، لەندەن و واشنتن بکرێت. دەبێ لە ئامەد، ئەدیرنە، ترابزۆن و ئەنقەرە بەڕێوەبچێت."

 

ئاریکان پێیوایە "کۆتاییهێنان بە تیرۆر لە تورکیا بەس نییە" و دەڵێت: "پێویستە قەییووم، تووندوتیژی، کین و نەفرەت، سیاسەتی نکۆڵیکردنیش کۆتایی پێبهێندرێت. ئەم هەموو فاکتەرە رێگەخۆشکەرن بۆ گەڕاندنەوەی ئارامی و سەقامگیری بۆ تورکیا." 

 

رۆژی 12ـی ئایاری 2025، پارتی کرێکارانی کوردستان (پەکەکە) ئەنجامی کۆنگرەکەی 12ـی بۆ رای گشتی بڵاوکردەوە و رایگەیاند، خۆی هەڵدەوەشێنێتەوە و کۆتایی بە خەباتی چەکداری دەهێنێت.