نرخی سووتەمەنی لە باکووری کوردستان و تورکیا بەرزبووەوە

 

بەگوێرەی نوێترین بڕیار کە لەلایەن حکومەتی تورکیاوە دراوە و ئەمڕۆ کەوتە بواری جێبەجێکردنەوە، نرخی سووتەمەنی وەک بەنزین و گازوایل لەنێوان 1.30-1.55 لیرە (نزیکەی 75 دیناری عێراقی) خرایە سەر و بەوەش نرخی هەر لیترێک بەنزین گەیشتە 37.43 لیرە (نزیکەی 1815 دیناری عێراقی) و نرخی هەر لیترێک گازوایل بۆ 36.88 لیرە (نزیکەی 1792 دیناری عێراقی). 

 

دوایینجار، رۆژی 3ی ئابی ئەمساڵ، نرخی بەنزین و گازوایل و گازی شلی ئۆتۆمبێلەکان نزیکەی 1.23-1.40 لیرە (نزیکەی 72 دیناری عێراقی) بەرزبووەوە و لە مانگی تەممووزیشدا دوو جار نرخ بەرزکرایەوە. 

 

بەمەش لە ماوەی دوو مانگدا، نرخی بەنزین و گازوایل و گازی شلی ئۆتۆمبێلەکان بەرێژەی 83٪ بەرزبووەتەوە. 

 

بەرزبوونەوەی نرخی سووتەمەنی ناڕەزایەتی زۆری خەڵک و سەندیکا پیشەییەکان و لایەنەکانی ئۆپۆزیسیۆنی لێکەوتوەتەوە و هاوکات بووەتە هۆی گرانبوونی نرخی گواستنەوەی گشتیی پاسەکانی ناوخۆ و تەکسییەکانیش. 

 

بەگوێرەی ئامارە فەرمییەکان، رۆژانە لە تورکیا و باکووری کوردستاندا بە تێکڕا 14 ملیۆن لیتر بەنزین و 56 ملیۆن لیتر گازوایل بەکاردەهێندرێت.