گەشتوگوزاری تورکیا: هەر دراما و فیلمێک بایەخ بە ناوچە گەشتیارییەکانمان بدات، پاڵپشتیی دارایی دەکەین

 

 

ئەرسۆی رایگەیاند، ئامانجی سەرەکییان گۆڕینی کەرتی گەشتوگوزارە بۆ پێکهاتەیەکی بەهێز کە لە بەرامبەر قەیرانەکاندا خۆڕاگر بێت؛ راشیگەیاند کە لە رێگەی (ئاژانسی پەرەپێدان و ناساندنی گەشتوگوزاری تورکیا)ەوە چالاکییەکانی ناساندن، ریکلامکردن و هەمەجۆریی بەرهەمە گەشتیارییەکانیان زیاتر کردووە.

 

ئەرسۆی تیشکی خستە سەر دۆخی سیاسیی ناوچەکە و گوتی: "تورکیا پێگەی خۆی وەک دوورگەی سەقامگیری دەپارێزێ. سەرەڕای ژینگەی شەڕ لە دەوروبەرمان، چاوەرێی جووڵەیەکی بەهێزی گەشتیارین. ئێمە پێشتر تەنیا لە 6 بۆ 7 وڵاتەوە گەشتیارمان بۆ دەهات، بەڵام ئێستا لەنێو خەڵکی نزیکەی 200 وڵاتدا ریکلام دەکەین و گەشتیار دەهێنین."

 

وەزیری گەشتوگوزاری تورکیا ئاماژەی بە گەشەی ئابووریی چارەکی یەکەمی ئەم ساڵ کرد کە 4.2٪ی تۆمار کردووە و گوتی: "ئەگەر شەڕ لە 28ی شوباتدا دەستی پێنەکردایە، ئەم رێژەیە زۆر بەرزتر دەبوو."

 

ئەرسۆی باسی لە پڕۆژەی کەناراوە گشتییە بێ بەرامبەرەکان کرد و رایگەیاند، لە چوارچێوەی خزمەتگوزاریی کواڵیتی بەرزدا ژمارەی کەناراوە گشتییە بێ بەرامبەرەکان لە 20 کەناراوەوە بۆ 23 کەناراو لە ساڵی 2026 زیاد دەکەن، بە تایبەتی لە ناوچەکانی وەک بۆدروم، ئەنتاڵیا، سیدە و کەناراوە نوێیەکانی بەدلیس، سینۆپ و سامسۆن.

 

سەبارەت بە پێشبڕکێکانی فۆرمولا 1، وەزیری گەشتوگوزار باسی لەوەکرد، تیمێکی تایبەتیان بۆ ئەم مەبەستە پێکهێناوە و ئامادەکارییەکان بۆ پڕۆژەی ئۆکتۆبەری 2027 دەستیان پێکردووە، بە شێوازێک کە پاکێجی تایبەت بۆ گەشتیاران ئامادە دەکرێ تاوەکو پێش پێشبڕکێکە و دوای پێشبڕکێکەش لە ناوچە کەناراوەکانی ئیجە و دەریای نێوەڕاست بمێننەوە.

 

لە تەوەرێکی دیکەی قسەکانیدا ئەرسۆی باسی لە گرنگیی گێڕانەوەی ئەو پارچە شوێنەوارییە مێژووییانە کردەوە کە بە قاچاخ براونەتە دەرەوە و رایگەیاند، "نزیکەی سێیەکی ئەو پارچە شوێنەوارییە کولتوورییانەی لە مێژووی کۆماردا گێڕدراونەتەوە، لە 25 ساڵی رابردوودا بووە و نیوەی ئەو رێژەیەش تەنیا لە 8 ساڵی رابردوودا گەڕێندراونەتەوە وڵات."

 

وەزیری گەشتوگوزاری تورکیا باسی لەوە کرد، بەهۆی کاریگەریی بەهێزی دراما تورکییەکان لە جیهاندا مۆدێلێکی نوێی پشتگیریی داراییان بۆ ساڵی 2026 داڕشتووە، بە شێوەیەک کە هەر دراما و فیلمێک لە سیناریۆکەیدا بایەخ بە ناساندنی کولتوور و ناوچە گەشتیارییەکانی تورکیا بدات، بەپێی رێژەی بینینی لە دەرەوەی وڵات، پاڵپشتی دارایی پێشکەش دەکرێ.

 

ئەرسۆی تیشکی خستە سەر رۆژژمێری چالاکییە نێودەوڵەتییەکانی تورکیا و رایگەیاند، لە 30ی ئایاردا کۆنسێرتی گەورەی "کانیێ وێست" بە ئامادەبوونی زیاتر لە 100 هەزار کەس بەڕێوەدەچێت و لە 20ی ئایاردا یاریی کۆتایی خولی ئەورووپا (UEFA) لە ئیستەنبووڵ بەڕێوەدەچێت کە تەواوی بلیتەکانی فرۆشراون، ئەمەش جووڵەیەکی گەورەی ئابووری و گەشتیاری بۆ وڵات دروست دەکات.

 

لە ساڵی 2025دا 64 ملیۆن گەشتیار سەردانی تورکیایان کرد و داهاتی کەرتی گەشتیاری بریتی بوو لە 65.2 ملیار دۆلار. بۆ ساڵی 2026 تورکیا ئامانجی وایە داهاتی گەشتیاری بۆ 68 ملیار دۆلار بەرز بکاتەوە.