دەستەی باڵای هەڵبژاردنەکانی تورکیا: سەرەتای 2024 دەست بە ئامادەکارییەکان بۆ هەڵبژاردنی شارەوانییەکان دەکەین
رووداو دیجیتاڵ
سەرۆکی دەستەی باڵای هەڵبژاردنی تورکیا رایگەیاند لە سەرەتای ساڵی نوێدا دەست بەئامادەکارییەکان دەکەن بۆ هەڵبژاردنی شارەوانییەکانی تورکیا.
لە راگەیێندراوێکدا کە لە ماڵپەڕی دەستەکە بڵاوکراوەتەوە، ئەحمەد یەنەر وادەی دەستپێکردنی ئامادەکارییەکانی هەڵبژاردنی شارەوانییەکانی تورکیا و باکووری کوردستان ئاشکرا کرد و رایگەیاند، رۆژی 1ی کانوونی دووەمی 2024، رۆژژمێری هەڵبژاردنەکان ئاشکرا دەکەن، کە بڕیارە رۆژی 31ـی ئاداری 2024 بەڕێوەبچێت.
ئەحمەد یەنەر راشیگەیاند، لە مانگی ئەیلوولی 2023، دەستدەکەن بە سەرجەم ئامادەکارییەکانیان لە ناوچە بوومەلەرزەلێدراوەکان و چاککردنەوەی هەر جۆرە کەموکوڕییەک و دەرخستنی زانیارییە نوێیەکان لەبارەی تۆماری دەنگدەران و سەرجەم خزمەتگوزارییە پەیوەندیدارەکان بە هەڵبژاردنی شارەوانییەکان.
رۆژی 31ی ئاداری 2019، هەڵبژاردنی شارەوانییەکانی تورکیا کرا. بەگوێرەی ئامارەکان؛ ئاکپارتی 776، جەهەپە 263، مەهەپە 245، هەدەپە 70، ئیی پارتی 25 شارەوانییان بەدەستهێنا. لەم هەڵبژاردنەدا ئاکپارتی گەورەشارەوانییەکانی ئەنقەرە، ئیستەنبووڵ، ئادانا و مێرسین ـی لەدەستدا و جەهەپە لێیان براوە بوو.