پەرلەمانی تورکیا پێشنیازێکی دەم پارتی بەهۆی دەستەواژەی 'شارە کوردییەکان' رەتکردەوە

 

نەورۆز ئویسال ئاسلان، پەرلەمانتاری پارتی یەکسانی و دیموکراسیی گەلان (دەم پارتی) لە بازنەی شرنەخ، پێشنیازێکی پێشکێشی سەرۆکایەتیی پەرلەمان کردبوو بۆ پێکهێنانی لیژنەیەکی لێکۆڵینەوە سەبارەت بە "کوشتنی بکەرنادیارەکان، بێسەروشوێنکردن لەژێر چاودێریی دەوڵەت و لەسێدارەدانە نایاساییەکان."

 

"سەرۆکایەتیی پەرلەمانی تورکیا بە واژۆی نوعمان کورتولموش، سەرۆکی پەرلەمان، پێشنیازەکەی بۆ پەرلەمانتارەکە گەڕاندووەتەوە و داوای کردووە دەستکاری بکرێت.

 

لە نووسراوی گەڕاندنەوەکەدا ئاماژە بە پەیڕەوی ناوخۆی پەرلەمان کراوە و هاتووە: "دەستەواژەی 'شارە کوردییەکان' کە پێشنیازەکەدا هاتووە، ئەگەری هەیە ئازاری بەشێک لە کۆمەڵگە بدات و برینداری بکات." پەرلەمان داوای کردووە ئەو دەستەواژەیە لاببرێت بۆ ئەوەی جارێکی دیکە کاری لەسەر بکرێت.

 

نەورۆز ئویسال ئاسلان، رۆژی چوارشەممە، 20ی ئایاری 2024، ناڕەزایەتیی تووندی بەرامبەر بڕیارەکە دەربڕی و رایگەیاند، لە پێشنیازەکەیدا هیچ گوتارێکی نەشیاو نییە.

 

ئەو پەرلەمانتارەی دەم پارتی گوتی: "ئەم بڕیارە لە هەفتەی ونبوواندا، پەیامێکی سیاسییە دژی کەسوکاری ونبووان، دایکانی شەممە و هەموو ئەو کەسانەی بەدوای راستییەکاندا دەگەڕێن."

 

ئاسلان رەخنەی لە گوتەکانی وەزیری دادی تورکیا گرت کە گوتبووی "دادپەروەری بەسەرچوونی نییە" و رایگەیاند، ئەگەر وایە دەبێت دادپەروەری بۆ دۆسیە هەستیارەکانی وەک: موسا عەنتەر و ڤەدات ئایدن، کۆمەڵکوژیی رۆبۆسکی، رووداوەکانی لجێ، جزیرێ و ڤارتینیس جێبەجێ بکرێت.

 

رەتکردنەوەی پێشنیازەکان لە پەرلەمانی تورکیا بەهۆی بەکارهێنانی وشەی "کوردستان" یان "شارە کوردییەکان" بووەتە دیاردەیەکی بەردەوام و زۆرجار دەبێتە هۆی دروستبوونی گرژی لەنێوان فراکسیۆنە کوردییەکان و سەرۆکایەتیی پەرلەماندا.