بوومەلەرزەیەکی بەهێز ئیستەنبووڵی هەژاند

 

ئەمڕۆ لە دەریای مارمارا لە سنووری پارێزگای ئیستەنبووڵ لە ماوەی نزیکەی یەک کاژێر دا، چوار بوومەلەرزە روویاند. ئەوەی گوڕەکەی 6.2 بوو، بەهێزترینیان بوو.

سەرۆکایەتیی کارەساتی لەناکاو و فریاگوزاریی تورکیا (ئافاد) بڵاویکردەوە، کاژێر 12:49خولەکی ئەمڕۆ چوارشەممە 23ـی نیسانی 2025 لە دەریای مارمارا بوومەلەرزەیەک بە گوڕی 6.2 پلەی رێختەر روویدا.

چەقی بوومەلەرزەکە بە دووری 23.16 کیلۆمەتر لە شارۆچکەی سیلیڤری ئیستەنبووڵ هەڵکەوتووە. 

بەگوێرەی ئافاد، بوومەلەرزەکە لە ناوچەکانی دەورووبەر هەستی پێکراوە و ترسی و دڵەڕاوکەی لە نێو خەڵکدا دروستکردووە. 

چەند خولەکێک پێشتر سەرۆکایەتیی کارەساتی لەناکاو و فریاگوزاریی تورکیا (ئافاد) بڵاویکردەوە، لە کاژێر 12:13 خولەکدا هەر لەو ناوچەیە بوومەلەرزەیەک بە گوڕی 3.9 پلەی رێختەر و لە قوڵایی 6.99 کیلۆمەتر تۆمارکراوە. 

سەرۆکایەتیی ئافاد لە کاژێر 12:51 خولەکدا رایگەیاند، بوومەلەرزەیەکی دیکە بە گوڕی 4.4 پلەی رێختەر لە دەریای مارمارا روویداوە، چەقی ئەم بوومەلەرزەیە بە دووری 14.74 کیلۆمەتر لە شارۆچکەی بیوکچەکمەجە هەڵکەوتووە و لە قوڵایی حەوت کیلۆمەتر تۆمارکراوە. 

بەگوێرەی ئافاد لە کاژێر 13.02 خولەک بوومەلەرزەیەکەی دیکە بە گوڕی 4.9 پلەی رێختەر لە هەمان ناوچە روویداوە. چەقی ئەو بوومەلەرزەیە بە دووری 16.77 کیلۆمەتر لە شارۆچکەی بیوکچەکمەجە هەڵکەوتووە و لە قوڵایی 7.02 کیلۆمەتر تۆمارکراوە. 

تائێستا هیچ زیانێکی گیانی لەبارەی ئەو بوومەلەرزەیە تۆمار نەکراوە.