لە رووداوێکی هاتووچۆدا لە تورکیا حەوت کرێکار گیانیان لەدەستدا و 14ی دیکەیش برینداربوون

بەڕێوەبەرایەتیی هاتووچۆی پارێزگای ئافیۆن کاراهیسار بڵاویکردەوە، مینی پاسێکی تایبەت بە گواستنەوەی کرێکاران تایەیەکی تەقیوە و بەو هۆیەوە لەسەر رێگەی سەرەکیی نێوان شارۆچکەی چای و شاری ئافیۆن کاراهیسار وەرگەڕاوە. 

 

بەڕێوەبەرایەتیی هاتووچۆی شارەکە دەڵێت، لە ئەنجامی وەرگەڕانی مینی پاسەکە حەوت کرێکار گیانیان لەدەستداوە و 14 کرێکاری دیکەش برینداربوون و لە رێگەی ئەمبووڵانسەوە گوێزراونەتەوە نەخۆشخانە. 

 

شەش لە کرێکارە بریندارەکان کە یەکێکیان مێرمنداڵە دۆخی تەندروستییان ناجێگیرە و لە نەخۆشخانەی فێرکاری شارەکەدا چارەسەر وەردەگرن. 

 

بەگوێرەی ئامارە فەرمییەکان، ساڵی 2022 لە باکووری کوردستان و تورکیا 485 هەزار و 48 رووداوی هاتووچۆ روویانداوە و لە ئەنجامدا دوو هەزار و 282 کەس گیانیان لەدەستداوە و 291 هەزار و 151 کەسی دیکەش برینداربوون.