ئۆجەلان چاوی کەوت بە برا و برازایەکی

 

رۆژی پێنجشەممە، 26ـی شوباتی 2026، نووسینگەی یاسایی سەدە، لە هەژماری خۆی لە تۆڕی کۆمەڵایەتیی ئێکس بڵاویکردەوە، عەبدوڵڵا ئۆجەلان، لە دوورگەی ئیمرالی لەگەڵ محەممەد ئۆجەلانی برای و عومەر ئۆجەلانی برازای کۆبووەتەوە.

 

بەگوێرەی راگەیێندراوەکە، جگە لە ئۆجەلان، زیندانییەکانی دیکەی ئیمرالیش چاویان بە کەسوکاریان کەوتووە.

 

نووسینگەی یاسایی سەدە رایگەیاند: "بەڕێز عەبدوڵڵا ئۆجەلان ئەمڕۆ لە دوورگەی ئیمرالی لەگەڵ ئەندامانی خێزانەکەی، محەممەد ئۆجەلان و عومەر ئۆجەلان، کۆبووەوە. هەروەها بریکارەکانی دیکەمان بەڕێزان حامیلی یڵدرم، عومەر خەیری کۆنار، ئەرگین ئاتابەی و مەحموود یامالاک هەر ئەمڕۆ لە دوورگەی ئیمرالی لەگەڵ ئەندامانی خێزانەکانیان کۆبوونەوە." 

 

کۆبوونەوەکە لە کاتێکدایە، ماوەیەکی زۆر بوو پارێزەران و خانەوادەی زیندانییەکان بۆ ئەنجامدانی دیدار، سەردانی دامەزراوە پەیوەندیدارەکانیان دەکرد، بەڵام وەڵامی ئەرێنییان دەستنەدەکەوت. 

 

تاوەکو ئێستا لەبارەی ناوەڕۆکی کۆبوونەوەکە و پەیامەکانی ئۆجەلان، زانیاریی ورد بڵاونەکراوەتەوە.

 

سبەی هەینی 27ی شوباتی 2026، ساڵێک بەسەر بانگەوازەکەی ئۆجەلان بۆ خۆهەڵوەشاندنەوە و چەکدانانی پەکەکە تێدەپەڕێت و بڕیارە دەم پارتی لە کۆنفرانسێکی رۆژنامەڤانی لە ئەنقەرە پەیامێکی نوێی ئۆجەلان بڵاوبکاتەوە.