ئەردۆغان: کۆبوونەوەم لەگەڵ ترەمپ زۆر زۆر سەرکەوتوو بوو

 

دوای پشوویەکی سێ هەفتەیی، رۆژی دووشەممە کابینەی حکومەتی سەرۆکایەتیی تورکیا لە کۆشکی بێشتەپە لە ئەنقەرە کۆبووەوە. دوای کۆبوونەوەکە کە نزیکەی سێ کاژێر و نیوی خایاند و بە سەرۆکایەتیی ئەردۆغان بەڕێوەچوو، سەرۆککۆماری تورکیا دەربارەی سەردانەکەی بۆ ئەمریکا، پێشهاتەکانی رۆژهەڵاتی نێوەڕاست و پڕۆژە نوێیەکان قسەی بۆ رۆژنامەڤانان کرد.

 

ئەردۆغان رایگەیاند، رۆژی 25ی ئەیلوول لە کۆشکی سپی لەگەڵ ترەمپ و شاندەکەیدا کۆبوونەوەیەکی "گشتگیر، بەرهەمدار و گرنگیان" کردووە. ئاماژەی بەوەشکرد، لە کۆبوونەوەکەدا باسیان لە بابەتەکانی بازرگانیی دووقۆڵی، وەبەرهێنان، وزە و پیشەسازیی بەرگری کردووە و هەنگاوەکانی گەیشتن بە ئامانجی 100 ملیار دۆلاری قەبارەی بازرگانی تاوتوێکراون، کە لە خولی یەکەمی سەرۆکایەتیی ترەمپدا دانرابوو.

 

ئەردۆغان، رەخنەی تووندی لە ئۆپۆزیسیۆن گرت و گوتی، "تاکە هۆکاری هەوڵی شێتانەی ئۆپۆزیسیۆن بۆ ناشیرینکردنی سەردانەکەمان بۆ ئەمریکا ئەوەیە کە سەردانەکە زۆر زۆر سەرکەوتوو بووە."

 

سەرۆککۆماری تورکیا، وەڵامی رەخنەی پارتەکانی ئۆپۆزیسیۆنی لەبارەی رێککەوتنی کڕینی فڕۆکەی بۆینگ دایەوە و گوتی، "کڕینی فڕۆکە وەک کڕینی شیر لە مارکێت نییە. پێویستە پێداویستییەکانت دیاری بکەیت، پلانی بۆ دابنێیت، دواتر گفتوگۆ و دانوستاندن بکەیت و لە کۆتاییدا دوای گفتوگۆیەکی درێژخایەن بگەیتە رێککەوتن."

 

رەجەب تەیب ئەردۆغان، ئاشکرایکرد کە لە 81 پارێزگای تورکیا و باکووری کوردستاندا  500 هەزار یەکەی نیشتەجێبوون دروست دەکرێن. راشیگەیاند، لە پڕۆژەکەدا پێشینە دەدرێتە گەنجان، خێزانە سێ منداڵییەکان و بنەماڵەی شەهید و بریندارانی سەنگەر. بۆ یەکەمجار لە رێگەی ئیدارەی گەشەپێدانی خانووبەرەی تورکیا (TOKİ) سیستمی یەکەی نیشتەجێبوون بە کرێ پەیڕەو دەکرێت.