ئۆجەلان پشتگیریی رێککەوتنی مەزڵووم عەبدی و ئەحمەد شەرع دەکات و داوای ئاسانکاری لە تورکیا دەکات

 

عەبدوڵڵا ئۆجەلان، رێبەری زیندانیکراوی پارتی کرێکارانی کوردستان [کە لە کۆنگرەیەکدا بڕیاری خۆهەڵوەشاندنەوەیان داوە] بەهۆی هاتنی ساڵی نوێوە پەیامێکی بڵاوکردەوە، وێڕای پیرۆزبایی رایگەیاند، پشتیوانی لە رێککەوتنی 10ـی ئازاری مەزڵووم عەبدی، فەرماندەی گشتیی هەسەدە و ئەحمەد شەرع، سەرۆککۆماری راگوزەری سووریا دەکات.

 

رێبەری پەکەکە لە پەیامەکەدا رایگەیاند، "ئەرکی سەرەکیمان رێگرییە لە ئاڵۆزیی نوێ". راشیگەیاند، "چارەسەری کێشەی کورد تەنیا لە رێگەی ئاشتییەکی کۆمەڵایەتی و تەباییەکی دیموکراسییەوە دەبێت".

 "زۆر گرنگە بە رێگەی ململانێ، شەڕ، سەربازی و ئەمنی کێشەکە یەکلایی نەکرێتەوە، بەڵکو لەسەر زەوینەیەکی دیموکراسی کە ئیرادەی گەلان بە بنەما دەگرێت، چارەسەر بکرێت و مامەڵەی لەگەڵدا بکرێت."

 

لە بەشێکی دیکەی پەیامەکەیدا، عەبدوڵڵا ئۆجەلان باسی دۆخی ژنان دەکات و دەڵێت: "دەبێت ئەوە لەبیر نەکەین؛ تاوەکو ژن ئازاد نەبێت، کۆمەڵگەش ئازاد نابێت، ئەمە مەحاڵە. تاوەکو کێشەی ئەقڵییەتی باڵادەستی پیاوسالاری چارەسەر نەکرێت، کولتووری شەڕ کۆتایی نایەت و ئاشتیش جێگیر نابێت".

 

رێبەری پەکەکە لە بەردەوامیی پەیامەکەیدا باسی دۆخی سووریا و رۆژئاوای کوردستانی کرد و گوتی: "ئەو ئەقڵییەتی بەڕێوەبردنەی کە ساڵانێک لەسەر بنەمای تاکڕەوی، گوشار و نکۆڵیکردن لە ناسنامەکان [لە سووریا و رۆژئاوای کوردستان] بوو؛ چیتر ناتوانێت بەردەوام بێت و ئەمەش داخوازیی یەکسانی و ئازادیی کورد، عەرەب، عەلەوی و هەموو گەلانی بەهێزتر کردووە".

 

رێبەری پەکەکە دەڵێت: "لە نێوان هێزەکانی سووریای دیموکرات (هەسەدە) و ئیدارەی دیمەشقدا، رێککەوتنی 10ی ئازار واژۆ کرابوو. لە چوارچێوەی ئەم رێککەوتنەدا، ئەو داخوازییانەی دەخرێنە روو، مۆدێلێکی سیاسیی دیموکراتییە کە تێیدا هەموو پێکهاتە و نەتەوەکان پێکەوە خۆیان بەڕێوە دەبەن. ئەم نزیکایەتییە دەتوانێت لەگەڵ حکومەتی ناوەندی گفتوگۆ بکات و زەوینەی یەکگرتنێکی دیموکراتی (ئینتێگراسیۆن) لە خۆ بگرێت؛ جێبەجێکردنی رێککەوتنی 10ی ئازار رێگە لەبەردەم پڕۆسەکەدا دەکاتەوە و لە هەمان کاتدا پەرەی پێ دەدات."

 

لەبارەی پەیوەندیی تورکیا بە نێوەندگیریی لەنێوان رۆژئاوای کوردستان و دیمەشقدا ئۆجەلان ئاماژە بەوە دەکات: "زۆر گرنگە کە تورکیا لەم پڕۆسەیەدا رۆڵێکی ئاسانکار و بونیاتنەر بگێڕێت و رێگە بۆ دیالۆگ بکاتەوە. ئەمە چ بۆ ئاشتیی ناوچەیی و چ بۆ بەهێزکردنی ئاشتیی ناوخۆیی زۆر هەستیار و گرنگە".

 

رێبەری پەکەکە داوا دەکات، ساڵی 2026 " نەبێتە ساڵی شەڕ، وێرانکاری و جیاکاری، بەڵکو ببێتە ساڵی بڕیاردان بۆ بونیاتنانی تەبایی دیموکراسی، ئاشتی و بونیاتنانی ئایندەی هاوبەشی گەلان".

 

 

پێ دەنێینە ساڵێکی نوێوە. پێویستە جارێکی دیکە ئەوە وەبیر بهێنینەوە کە لە ماوەی سەدەی رابردوودا هێرشە ئیمپریالیستی و نەژادپەرستییەکان لەنێو یەکتردا گەشەیان کرد و رۆژهەڵاتی نێوەڕاستیان خستە نێو شەڕ و ململانێیەکی سەختەوە. ئەم شەڕە رێگەی بۆ وێرانکاری و داڕمانی کۆمەڵایەتی خۆش کرد. ئەو مەزهەبگەرایی و نەتەوەپەرستییە نەتەوەییەی ئەمڕۆ لە ناوچەکەدا دەکرێت، هەمووی ڕەگی لەم مێژووە نزیک و پڕ لە ئازارەوە گرتووە. بەداخەوە ستراتیژیی 'دابەش بکە، بیدە بە گژ یەکدا و بەڕێوە ببە'ی سیستمی هەژموونخواز، بە شێوەی جیاواز بەردەوامە.

ئەو دیدگەیەی ئاشتی و کۆمەڵگەی دیموکراسی کە ئێمە لەبەر ئەم هۆکارە پەرەمان پێدا، تەنیا بژاردەیەک نییە؛ بەڵکو وەک پێویستییەکی مێژوویی لە بەردەمماندا وەستاوە، ئەگەر ئەم دیدگەیە بە دروستی تێبگەین و هەڵسەنگاندنی بۆ بکرێت، دەتوانێت رێگری لە شەڕ و ململانێکان بکات، ئەم دیدگەیە ژەهرکوژێکە کە زەوینەی ژیانێکی پێکەوەیی، ئاشتییانە و ئازاد دەئافرێنێت، بەرپرسیارێتی سەرەکیمان بۆ قۆناخی داهاتوو؛ رێگریکردنە لە ململانێیەکی نوێ کە ئەگەری روودانی گەڕانەوەیە بۆ نەبووەکان.

 

قەیران و ململانێ سیاسییەکانی رۆژهەڵاتی نێوەڕاست کە رۆژ لە دوای رۆژ قووڵتر دەبنەوە، ئەنجامی بێگومانی بنبەستبوونی ئەقڵییەتی شارستانییەتی ستەمکارە کە بنەمای دەسەڵاتخوازی و دەوڵەتگەراییە و هەزاران ساڵە بەردەوامە.

 

کێشەی کورد لە چەقی ئەم قەیرانانەدا جێگەی گرتووە، چارەسەری کێشەکەش تەنیا لە رێگەی ئاشتییەکی کۆمەڵایەتی و تەباییەکی دیموکراسییەوە دەبێت. زۆر گرنگە بە رێگەی ململانێ، شەڕ، سەربازی و ئەمنی کێشەکە یەکلایی نەکرێتەوە، بەڵکو لەسەر زەوینەیەکی دیموکراسی کە ئیرادەی گەلان بە بنەما دەگرێت، چارەسەر بکرێت و مامەڵەی لەگەڵدا بکرێت.

 

دەبێت ئەوە لەبیر نەکەین؛ تاوەکو ژن ئازاد نەبێت، کۆمەڵگەش ئازاد نابێت، ئەمە مەحاڵە. تاوەکو کێشەی ئەقڵییەتی باڵادەستی پیاوسالاری چارەسەر نەکرێت، کولتووری شەڕ کۆتایی نایەت و ئاشتیش جێگیر نابێت. لەبەر ئەم هۆکارە، من ئازادیی ژنان وەک بونیاتنەری کۆمەڵگەی دیموکراسی و پرەنسیپێکی دانەبڕاو دەبینم.

لە سووریاشدا تابلۆیەکی ئاڵۆز (کائۆتیک) هاتووەتە ئاراوە. زۆر بە ئاشکرا چاوەڕوانی چارەسەرێکی دیموکراسییە و پێویستی بەوەیە. ئەو ئەقڵییەتی بەڕێوەبردنەی کە ساڵانێک لەسەر بنەمای تاکڕەوی، گوشار و نکۆڵیکردن لە ناسنامەکان بوو؛ چیتر ناتوانێت بەردەوام بێت و ئەمەش داخوازیی یەکسانی و ئازادیی کورد، عەرەب، عەلەوی و هەموو گەلانی بەهێزتر کردووە. لە نێوان هێزەکانی سووریای دیموکرات (هەسەدە) و ئیدارەی دیمەشقدا، رێککەوتنی 10ی ئازار واژۆ کرابوو. لە چوارچێوەی ئەم رێککەوتنەدا، ئەو داخوازییانەی دەخرێنە روو، مۆدێلێکی سیاسیی دیموکراتییە کە تێیدا هەموو پێکهاتە و نەتەوەکان پێکەوە خۆیان بەڕێوە دەبەن. ئەم نزیکایەتییە دەتوانێت لەگەڵ حکومەتی ناوەندی گفتوگۆ بکات و زەوینەی یەکگرتنێکی دیموکراتی (ئینتێگراسیۆن) لە خۆ بگرێت. جێبەجێکردنی رێککەوتنی 10ی ئازار رێگە لەبەردەم پڕۆسەکەدا دەکاتەوە و لە هەمان کاتدا پەرەی پێدەدات.

 

زۆر گرنگە کە تورکیا لەم پڕۆسەیەدا رۆڵێکی ئاسانکار و بونیاتنەر بگێڕێت و رێگە بۆ دیالۆگ بکاتەوە. ئەمە چ بۆ ئاشتیی ناوچەیی و چ بۆ بەهێزکردنی ئاشتیی ناوخۆیی زۆر هەستیار و گرنگە.

 

مێژووی هاوچەرخی رۆژهەڵاتی نێوەڕاست، بە گشتی مێژووی شۆڕشە نەرێنییەکانە؛. شەڕ، زۆرداری، نکۆڵی و وێرانکاری... لە بەرامبەر ئەمەدا پێشنیازی ئێمە شۆڕشی ئەرێنییە، یان لەنوێ بونیاتنانەوەی کۆمەڵگە بە شێوازێکی دیموکراسی، ئاشتییانە و ئەخلاقییە. ئەو ئاشتییەی ئێمە بە پێداگرییەوە جەختی لێ دەکەینەوە تەنیا ئەنجامێک نییە، بەڵکو دەبێت ببێتە سەرەتایەکی نوێ. تێکۆشانی ماف، یاسا و دیموکراسیبوون کە لەناو ئاشتیدا بەڕێوە دەچێت، کینە، دوژمنایەتی و تووڕەیی لەناو دەبات و دەرگەی ژیانێکی نوێ بۆ هەموان دەکاتەوە.

 

بەو هۆشیارییەوە؛ ساڵی نوێ با نەبێتە نەبێتە ساڵی شەڕ، وێرانکاری و جیاکاری، بەڵکو هیواخوازم ببێتە ساڵی بڕیاردان بۆ بونیاتنانی تەبایی دیموکراسی، ئاشتی و بونیاتنانی ئایندەی هاوبەشی گەلان.

 

خواستی من ئەوەیە کە ساڵی نوێ لە تورکیا، رۆژهەڵاتی نێوەڕاست و جیهاندا، رێگە بۆ ئاشتی، ئازادی و داهاتوویەکی دیموکراسی بکاتەوە. لە سەرووی هەموویانەوە، ساڵی نوێ لەو گەلانەی تێکۆشان دەکەن و لە هەموو دۆستان پیرۆز دەکەم.

 

هیوادارم ساڵی نوێ بۆ هەموو گەلەکەمان ئاشتی و ژیانێکی بەشکۆ بهێنێت، خۆشەویستی و سڵاوی خۆم ئاراستە دەکەم.

 

ئەم سەردەمە بە ئازادیی ژن بەهێز دەبێت و لەناو ئاشتیدا گەلان بە دیموکراسییەت دەبنە یەک.

 

30-12-2025

 

عەبدوڵڵا ئۆجەلان - ئیمراڵی