پەیامنێرانی رووداو رووماڵی هەڵبژاردنی شارەوانییەکانی تورکیا دەکەن

 

 

ئەو کەسانەی مافی دەنگدانیان هەیە 61 ملیۆن و 441 هەزار و 882 کەسن؛ 50.59%ی دەنگدەران ژن و 49.41%یشیان پیاون. لە هەڵبژاردنەکەدا ملیۆنێک و 32 هەزار و 610 کەس یەکەمجارە دەنگ دەدەن.

 

لە پارێزگاکانی باکووری کوردستان و هەشت پارێزگای تورکیا هەڵبژاردن کاژێر 07:00ـی بەیانی دەستیپێکرد و کاژێر 16:00 کۆتایی دێت. لە شوێنەکانی دیکەش هەڵبژاردن لە کاژێر 08:00 دەستیپێکرد و کاژێر 17:00کۆتایی دێت.

 

 

راوین ستێرک، پەیامنێری تۆڕی میدیایی رووداو لە ئیستەنبووڵ لەبارەی کەشی هەڵبژاردن دەڵێت، رکابەرییەکی تووند لەنێوان ئاکپارتی و جەهەپە هەیە، "چونکە ساڵی 2019 و دوای 30 ساڵ، جەهەپە گەورەشارەوانیی ئیستەنبووڵی وەرگرتەوە."

 

 

بەربژێری جەهەپە بۆ گەورەشارەوانیی ئیستەنبووڵ ئەکرەم ئیمامئۆغڵو-وە کە لە پێنج ساڵی رابردوودا سەرۆکایەتیی گەورەشارەوانییەکەی بەدەستەوە بووە. موراد کورومیش بەربژێری ئاکپارتییە.

 

 

ئەمڕۆ، جگە لە هەڵبژاردنی سەرۆکی گەورەشارەوانی، 39 شارەدار بۆ ناوچەکانی ئیستەنبووڵ هەڵدەبژێردرێن.

 

راوین ستێرک لە بنکەیەکی دەنگدانەوە گوتی، هەڵبژاردن لە رەوشێکی ئەمنیی چڕ بەڕێوەدەچێت.

 

هەروەها عومەر سۆنمەز، پەیامنێری رووداو لە ئیستەنبووڵ لە بنکەیەکی دیکەی دەنگدانەوە گوتی، لە زۆربەی ناوچەکانی ئیستەنبووڵ رکابەرایەتیی تووند لەنێوان ئاکپارتی و جەهەپە هەیە.

 

 

بڕیارە رەجەب تەیب ئەردۆغان، سەرۆککۆماری تورکیا و سەرۆکی ئاکپارتی، لە قوتابخانەی سافەت چەبی لە ناوچەی ئوسکوداری ئیستەنبووڵ دەنگ بدات. راوین ستێرک لەبەردەم ئەو قوتابخانەیە گوتی، "رەوشی ئەمنی لەم بنکەیەی دەنگدان لە ئاستێکی بەرزدایە و لەبەردەم بنکەکە خاڵێکی پشکنین دانراوە و هەر دەنگدەرێک کە دەیەوێت بچێتە ژوورەوە، پشکنینی وردی بۆ دەکرێت."

 

 

ژمارەیەکی زۆر کوردیش لە ئیستەنبووڵ دەژین و ئەوەش وایکردووە، دەم پارتی لەو شارەش بەربژێری هەبێت.

 

لە هەڵبژاردنی شارەوانییەکانی ساڵی 2019دا هەدەپە پاڵپشتیی لە ئەکرەم ئیمامئۆغڵو کرد و ئەوەش هۆکارێک بوو کە بەربژێرەکەی جەهەپە براوە بێت.

 

 

زیاتر لە 13 هەزار و 275 سندووقی دەنگدان لە ئەنقەرە دانراون.

 

شەوکەت هەرکی، پەیامنێری تۆڕی میدیایی رووداو لە ئەنقەرە دەڵێت، "قەرەباڵخییەکی زۆر لە بنکەکانی دەنگدان هەیە." زیاتر لە چوار ملیۆن دەنگدەر لە ئەنقەرە مافی دەنگدانیان هەیە.

 

ئەنقەرەش رکابەریی تووندی تێدایە و ئاکپارتی بە هاوکاریی مەهەپە شەڕی وەرگرتنەوەی گەورەشارەوانیی پایتەخت دەکات.

 

 

هاوشێوەی ئیستەنبووڵ، لە ئەنقەرەش دەم پارتی و ئیی پارتی بەربژێری خۆیان هەیە.

 

جەهەپە مەنسوور یاڤاش، سەرۆکی ئێستای گەورەشارەوانیی ئەنقەرەی بەربژێر کردووەتەوە. هاوپەیمانیی جمهوور کە لە ئاکپارتی و مەهەپە پێکدێت، تورگوت ئاڵتنئۆکی بۆ ئەو پۆستە بەربژێر کردووە. جەنگیز تۆپەل یڵدرم بەربژێری ئیی پارتییە و دەم پارتیش گولتان کشاناک و ئۆزتورک تورکدۆغانی بۆ ئەو پۆستە بەربژێر کردووە.

 

راپرسییەکان دەریدەخەن کە مەنسوور یاڤاش نزیکەی 42% و تورگوت ئاڵتنئۆک نزیکەی 38%ی دەنگەکان دەبەنەوە؛ ئیی پارتی نزیکەی 4% و دەم پارتیش نزیکەی 2%ی دەنگەکان بەدەست دەهێنن.

 

 

لە پارێزگای ئامەدی باکووری کوردستان، کاژێر 07:00 دەست بە دەنگدان کرا.

 

ماشەڵڵا دەکاک، پەیامنێری تۆڕی میدیایی رووداو لەو شارە گوتی، سەرەتا قەرەباڵخییەکی زۆر لە بنکەکانی دەنگدان نەبوو، بەڵام دواتر چوونی هاونیشتمانییان بۆ بنکەکانی دەنگدان زیاتر بوو.

 

 

لە ئامەد سێ هەزار و 975 سندووقی دەنگدان دانراون و ملیۆنێک و 160 هەزار کەس مافی دەنگدانیان هەیە.

 

هاونیشتمانییەک لە ئامەد بە رووداوی گوت، "کەسوکارمان هەموومان دەچنە سەر سندووقەکانی دەنگدان. هیوادارین دوای دەنگدان یەکگرتووییەکی زیاتر ببینرێت و کێ خزمەتی زیاتر دەکات، ئەو دەنگی زۆر بێنێت."

 

 

دۆغان هاتوون، هاوبەربژێری دەم پارتی بۆ گەورەشارەوانیی ئامەد، دوای دەنگدان لە یەکێک لە بنکەکانەوە قسەی بۆ ماشەڵڵا دەکاک کرد و گوتی، "هیوادارین خەڵک ئیرادەی خۆیان بپارێزن. ئەوانەی دژی کوردن، دەیانەوێت ئیرادەیان لێ وەربگرن، ئێمە ئێوارەی ئەمڕۆ وەڵامێکی باشیان دەدەینەوە."

 

 

دەم پارتی دوو کەسی بۆ پۆستی سەرۆکی شارەوانیی ئامەد بەربژێر کردووە و ئامانجیەتی ئەو شارەوانییە وەربگرێتەوە، ئەوەش دوای ئەوەی لە هەڵبژاردنی رابردوودا بردیەوە، بەڵام دواتر قەیوومی بۆ دانرا. دوو بەربژێرەکەی بریتین لە سەرا بوجاک و دۆغان هاتوون.

 

هەرچی ئاکپارتییە بە بەربژێرکردنی محەممەد هالیس بیلدەن لە رکابەرایەتییەکاندایە و جەهەپەش جەعفەر پێکدەمیری بەربژێر کردووە.

 

 

هەر لە ئامەد چەندین پارتی دیکە هەن کە ئەندام و لایەنگریان هەیە. فارووق دینچ بەربژێری هوداپار و محەممەدشاه ئەرەنیش بەربژێری هاکپارە.

 

 

راپرسییەکان دەریدەخەن کە دەم پارتی نزیکەی 50%ی دەنگەکان؛ ئاکپارتی نزیکەی 30%؛ هوداپار نزیکەی 5%ی دەنگەکان؛ جەهەپە نزیکەی 2%ی دەنگەکان دەبەنەوە. هاکپاریش نزیکەی 1%ی دەنگەکان بەدەستدەهێنێت.

 

 

رکابەری لە پارێزگای شرنەخی باکووری کوردستان لەنێوان دەم پارتی و ئاکپارتیدایە.

 

ناسر عەلی، نێردراوی تۆڕی میدیایی رووداو بۆ شرنەخ دەڵێت، قسەی لەگەڵ بەرپرسانی دەم پارتی کردووە و گوتوویانە، گەورەشارەوانیی شرنەخ دەبەنەوە.

 

 

ئاکپارتیش سوورە لەسەر ئەوەی کە سەرۆکایەتیی شارەوانیی شرناخ بەدەستبێنێتەوە.

 

 

سەردار تەتەر، بەرپرسی هەڵبژاردنی ئاکپارتیش لە پارێزگای شرنەخ قسەی بۆ ناسر عەلی، نێردراوی تۆڕی میدیایی رووداو کرد و گوتی، تاوەکو ئێستا هەڵبژاردنی شارەوانییەکان لە شرنەخ بە رێکوپێکی و بێ کێشە بەڕێوەدەچێت، خەڵک دەچنە سەر سندووقەکانی دەنگدان و ئازادانە دەنگ دەدەن.

 

لە سنووری پارێزگەی شرنەخ 19 شارەوانی هەن؛ سەنتەری شرنەخ، 6 قەزا و 12 ناحیە.

 

سەردار تەتەر دەڵێت، لە هەڵبژاردنی شارەوانییەکانی ساڵی 2019ـدا لە 15 شارەوانی براوە بوون؛ گوتیشی، "ئەم هەڵبژاردنە دەمانەوێت شارەوانی ناحیەیەکی دیکەش ببینەوە و بیکەینە 16 شارەوانی."

 

سەردار تەرتەر گوتی، "کاری شارەوانی خزمەتکردنە؛ لەو 15 شارەوانییە کە بەدەستی ئێمەوە بوون، خەڵک خزمەتی کراوە؛ بۆیە دڵنیاین خەڵک متمانەمان پێدەداتەوە."

 

پەیامنێری رووداو بە بەرپرسەکەی ئاکپارتی گوت، دەم پارتی "کاری زۆری بۆ زمانی کوردی کردووە و ئەوەش داوای خەڵکە. ئێوە چیتان کردووە بۆ زمانی کوردی؟" لە وەڵامدا بەرپرسەکەی ئاکپارتی گوتی، "لەوە دڵنیاین کوردبوونی ئێمە لەوانەی ئەندامی دەم پارتین زیاترە. ئێمە بۆ هەولێر، زاخۆ و قامیشلۆ دڵسۆزین؛ ئێمە خزمەتی کورد دەکەین."

 

 

 

لە پارێزگای ئێلیهـی باکووری کوردستان رکابەرایەتی لەسەر پۆستی گەورەشارەوانیی شارەکە لەنێوان دەم پارتی، ئاکپارتی و هوداپاردایە. 

 

هاونیشتمانییەکی شارەکە بە عەبدولسەلام ئاکنجی، پەیامنێری تۆڕی میدیایی رووداوی گوت، "کەسێکمان دەوێت کە دادپەروەر بێت."

 

 

لە ئێلیهـ زیاتر لە 411 هەزار کەس مافی دەنگدانیان هەیە و هەزار و 424 سندووقی دەنگدانیان بۆ دانراون.

 

 

فەرهاد ناسرئۆغڵو، پەرلەمانتاری ئاکپارتی و یەکێک لە پێنج نوێنەرەکەی ئێلیهـ لە پەرلەمانی تورکیا، لەکاتی دەنگدانیدا بۆ هەڵبژاردنی شارەوانییەکان لە شارەکەیدا بۆ تۆڕی میدیایی رووداو قسەی کرد و گوتی، "ناوچەی ئێمە شوێنێکی خۆشە و ئێمەش دەمانەوێت خۆشتری بکەین."

 

فەرهاد ناسرئۆغڵو ئاماژەی بەوەش کرد، "دەمانەوێت ناوچەکەمان بۆ منداڵەکانمان و گەنجەکانمان بەرەپێش بچێت. بۆ ئەوەش خزمەتکردن لە شارەوانی خزمەتکردنی خەڵکە. کێ بتوانێت زیاتر خزمەت بکات، دەبێت ئەو کەسە ببێتە سەرۆکی شارەوانیی" ئێلیهـ.

 

ئەو پەرلەمانتارەی ئاکپارتی ئاماژەی بەوەش کرد، کاتێک بۆ پەرلەمان خۆی بەربژێر کردووە، بەڵێنی چەند پڕۆژەیەکی داوە بۆ کەمکردنەوەی نەبوونی هەلی کار، ئێستا فەرمان بۆ جێبەجێکردنیان دەرچووە و بودجەشیان بۆ تەرخانکراوە.

 

 

بە گوتەی ئەو پەرلەمانتارە، زیاتر لە 20 هەزار کەس دەتوانن لەو پڕۆژانەدا کاریان دەستبکەوێت.

 

فەرهاد ناسرئۆغڵو دەڵێت، "لە شەڕ و کوشتندا هیچ بەدەستنایەت. ئێمە لە 40 ساڵی رابردوودا دەردی زۆرمان چەشت. نامانەوێت گەنجی ئێمە بچێتە چیاکان یان بخرێتە زیندانەوە. ئێمە ئەم ناوچەیەی خۆمان زۆر خۆش دەکەین."

 

لە تورکیا و باکووری کوردستاندا 30 گەورە شارەوانی، 51 شارەوانیی شارەکان و زیاتر لە 1000 شارەوانی شارۆچکەکان هەن؛ 20 هەزار و 745 ئەندامی ئەنجوومەنی شارەوانییەکان و هەزار و 272 ئەنجوومەنی گشتیی شارەکان هەن؛ هەروەها 50 هەزار و 229 موختار هەڵدەبژێردرێن.

 

 

لە هەڵبژاردنی شارەوانییەکانی ساڵی 2019دا ئاکپارتی 15 گەورەشارەوانی، جەهەپە 11 گەورەشارەوانی، هەدەپە 3 گەورەشارەوانی و مەهەپە 1 گەورەشارەوانییان بەدەستهێنا.