ئایا بەڕاستی یەكگرتوو دوژمنی فەرەنسا و كوردستانە؟
رۆژی پێنجشەممە 6ی ئۆكتۆبەری 2016، سەنتەری كوردی- فەرەنسی لە كۆشكی ئەنجوومەنی پیرانی فەرەنسا و بە ئامادەبوونی چەند سیناتۆرێك و دەستەبژێری سیاسی و ئەكادیمیی فەرەنسی، كۆنفرانسێكی لەسەر رۆژهەڵاتی ناوەڕاست سازكرد. گروپی فەرەنسی- عێراقی لە ئەنجوومەنی پیرانیش سەرپەرشتیاری راستەوخۆی كۆنفرانسەكە بوون.
من لەم گۆشە پێنج سەد وشەیەدا، كاتی ئەوەم نییە باس لە كۆی ئەو وتارانە بكەم كە پێشكەشكران و یەك يەك ناوی بەشداربووەكان بێنم، ئەم ئەركە بۆ ئەو رۆژنامەنووسانە بەجێدەهێڵم كە لە هۆڵەكەدا بوون و "غارغارێنیان"بوو بەدوای وەرگرتنی لێدوانێكدا. ئومێد دەكەم هەر هیچ نەبێت بەم ئەركە سەرەتاییەی خۆیان هەستابن.
ئەوەی من لێرەدا دەمەوێت لەسەری بوەستم، گوتارێكی سیاسی بیناكراو لەسەر "دێماگۆجیەت" و "پۆپلیزم/ شەعبەویەت"ی نووسەرێكی ناوداری فەرەنسی بوو، پاتریس فرانسیچسكی كە دروست وەك بەشێك لە نووسەرانی كوردستان و فەرەنسا، كۆمەڵێك گوزارشتی "بیرلێنەكراوە" و دوور لە هەموو پێوەرە زانستییەكانی بەكارهێنا. گەر دەسەڵات لە فەرەنسا و كوردستاندا ئەم گوزارشتانە وەربگێڕێتە سەر چوارچێوەی كار و جوڵانەوە و بیانكات بە پرۆگرام و جیهانبینی خۆی، بەدڵنیاییەوە نەك هەر بە هەڵەی گەورەدا دەچێت، بەڵكو رۆژهەڵاتی ناوەڕاستیش دەكات بە قەسابخانە.
بێگومان من لە وتارەكەی خۆمدا كۆی ئەو هەڵانەم بۆ راست كردەوە، بەڵام گرنگە ئاماژە بەوە بدەم كە دەسەڵات، چ لە فەرەنسا و چ لە كوردستانیشدا، ئەم جۆرە بیركردنەوە و لێكدانەوانەی نەكردووە بە ستراتیژی كاركردن. بەڵام ئەمە مانای ئەوە نییە كە هەموو ئەوانەی وەك پاتریس فرانسیچسكی بیردەكەنەوە، كاراییان لەسەر دەستەبژێری سیاسی هەردوو وڵات نییە.
تێزی هەرە سەرەكیی ئەم نووسەرە "گەورە و بەناوبانگە" بریتییە لەوەی كە دوژمنی سەرەكیی گەلی فەرەنسا و گەلی كورد بریتییە لە "ئیسلامیزم"! بەبێ ئەوەی بۆ یەكجاریش پێمان بڵێت ئیسلامیزم چییە و ئیسلامیستەكان كێن؟ رێك وەك من، هەموو ئەو سۆسیۆلۆگانەی كە لە هۆڵەكەدا بوون، هەر لە ئالان تورێنەوە تا دەگاتە میشێل ڤیڤیۆركا، پێیانوابوو كە گوزارشتەكانی ئەم برادەرە هیچ پەیوەندییەكی بە واقیعی كۆنكرێتیی سیاسییەوە نییە و دوورە لە بنەما سەرەتاییە زانستییەكان.
ئێمە لە قوتابخانەی خوێندنی باڵای زانستە كۆمەڵایەتییەكانی پاریس، چەندین سۆسیۆلۆگمان هەیە كە زیاتر لە 40 ساڵە كار لەسەر ئیسلامیزم دەكەن و كتێبخانەیەكی گەورەیان لەسەر بزووتنەوەكانی ئەم ئایدیۆلۆژیایە بەرهەمهێناوە. ئەلف و بای ئەم كتێبخانەیە بریتییە لە جیاكردنەوەی ئەم "كۆنسپێت/ چەمك"انە لە یەكتری : ئیسلامیزم، پۆست-ئیسلامیزم، فۆندامۆنتالیزم، نیۆ-فۆندامۆنتالیزم، تیرۆریزم، سەلەفیزم.
من لەو پانزە خولەكەی كە بۆم دانرابوو، بەخێرایی رووناكیم خستە سەر ئەوەی كە تاكە دوژمنی فەرمی و راگەیەنراوی گەلی فەرەنسا و گەلی كورد، لە ئێستا و ئێرەدا، تەنیا و تەنیا تیرۆریزمە و هەموو ئەو بزووتنەوانەن كە تیرۆریزمیان وەك چەكی ململانێ هەڵبژاردووە، بۆنموونە داعش و ئەلقاعیدە.
چ هەڵەیەكی گەورەیە كە ئەم نووسەرە "گەورە"یەی فەرەنسا بێت و راشید غەنوشی و ئەیمەن زەواهیری وەك یەك بخاتە نێو چوارچێوەی ئیسلامیزمەوە و بیانكات بە دوژمنی ژمارە یەكی فەرەنسا و كوردستان! لە كاتێكدا حكومەتەكەی فرانسوا هۆلاند، چەندین جار، هەم لە كۆشكی ئێلیزێ و هەم لە كۆشكی ئەنجوومەنی وەزیران، پێشوازی لە خودی غەنوشی و وەزیرەكانی نەهزە كردووە و پەیوەندییەكی بەهێز لەنێوانیاندا هەیە.
چ سەرلێشێوانێكی گەورەیە كە تۆ ئەمینداری گشتیی یەكگرتووی ئیسلامیی كوردستان، سەلاحەدین بەهائەدین و ئەبوبەكری بەغدادی وەك یەك بخەیتە چوارچێوەی ئیسلامیزمەوە و بیانكەیت بە دوژمنی ژمارە یەكی فەرەنسا و كوردستان، لەكاتێكدا تەنها هەفتەیەك لەمەوپێش، وەك لە كۆنفرانسەكەدا گوتم، سەلاحەدین بەهائەدین هاوڕێیەتی بەڕێز مەسعود بارزانی دەكات بۆ بەغدا و بەشداری دەكات لە دانانی پلانی هێرشكردن بۆ سەر داعش و رزگاركردنی مووسڵ! لەوەش زیاتر گەر سەلاحەدین بەهائەدین دوژمنی ژمارە یەكی فەرەنسا و كوردستانە، ئەی بۆ ئەمەریكییەكان دەعوەتی دەكەن بۆ واشنتن و بەشداری دەكەن لە كۆنگرەی دیمۆكراتەكاندا ؟ ئەی بۆ لە كوردستاندا ئەندام پەرلەمان و وەزیریان هەیە و ئەی بۆ ڕاپێچی زیندانەكانیان ناكەن ؟
گەر لە فەرەنسادا برایانی موسوڵمان و داعش وەكو یەك دوژمنی ژمارە یەكی جمهوریەتن، ئەی خێرە وەزارەتی ناوخۆی فەرەنسا ئەنجوومەنێكی فەرمی بۆ موسوڵمانانی فەرەنسا دروست كردووە و برایانیشی كردووە بە یەكێك لە لایەنە سەرەكیەكانی ئەو ئەنجوومەنە و مانگانە لەگەڵیان كۆدەبێتەوە و پێكەوە كاردەكەن ؟
ئەم تایپە لە رۆشنبیر ناتوانێت فێڵمان لێبكات و لە تاقیكردنەوەی "داتاكان"ی واقیعی كۆنكرێتیدا دەرناچێت. من لە چەندین توێژینەوەدا، بۆنموونە لە كتێبی "تیرۆریزم وەك بیناكردنی كۆمەڵایەتی"، بە وردی باسم لە ئیسلامیزم و هەموو چەمكەكانی دیكە كردووە و لێرەدا ناگەڕێمەوە سەریان، بەڵام دەمەوێت ئەم گۆشەیە بەوە كۆتایی پێ بهێنم كە: بەداخەوە، بەشێكی گرنگ لە میدیاكانیش، چ لە فەرەنسا و چ لە كوردستان، بەشداریی زیندوو دەكەن لە خستنە سەر شانۆی ئەم تایپە لە رۆشنبیر كە دوور لە ئەلف و بێ میتۆدۆلۆژییەكان، دروست وەك ماكینەیەكی "پۆپلیست/ شەعبەوی"، بەردەوام سەرگەرمی بەرهەمهێنانی "دێماگۆژیەتە".
هەروەها بەداخەوە كە چەند ئەكتەرێكی سیاسیش، لەوانە یەكێك لە سیناتۆرە فەرەنسیەكان، لە كۆنفرانسەكەدا، هەمان دروشمیان چەندین جار دووبارە كردەوە، بەبێ ئەوەی تێبگەن لەوەی باسی چی دەكەن. ئەمە چ جۆرە هاوپەیمانیەكی "نافەرمیە" كە لە نێوان رۆژنامەنووسێكی نابەرپرسیار و نووسەرێكی پۆپلیست و سیاسییەكی دێماگۆگدا دروست بووە!