ئێمباپێ سەرکردایەتی پیلانێک دەکات لە دژی ڤینیسیۆس

کارگێڕیی یانەی ریال مەدریدی ئیسپانی بەبێدەنگی، بەڵام بە بڕیارێکی یەکلاکەرەوە دەستی بە جووڵە کردووە بۆ کڕینی ئەستێرەیەکی نوێ، ئەمەش وەک ئامادەکارییەک بۆ ئەگەری رۆیشتنی ڤینیسیۆس جۆنیۆری بەرازیلی کە گومان لەسەر مانەوەی لە قەڵای سپی دروست بووە.

بەگوێرەی چەند راپۆرتێکی رۆژنامەڤانی لە ئیسپانیا، ڤینیسیۆس بووەتە یەکێک لە بەربژێرە سەرەکییەکان بۆ جێهێشتنی مێرێنگی لە بازاڕی گواستنەوەی داهاتوودا. ئەمەش فلۆرێنتینۆ پێرێزی ناچارکردووە دۆسێیەی جێگرەوەکان بکاتەوە بۆ ئەوەی رێگری بکات لە دروستبوونی هەر بۆشاییەکی هێرشبەری.

پێگەی Football España ئاشکرایکردووە، ریال مەدرید ناوی مایکڵ ئۆلیسێ، ئەستێرەی فەرەنسیی یانەی بایرن میونشنی خستووەتە سەرووی لیستی ئەو یاریزانانەی کە بڕیارە شوێنی ڤینیسیۆس بگرنەوە، ئەوەش بە راسپارەی کیلیان ئێمباپێ بووە.

لەم بارەیەوە کریستیان فالک، رۆژنامەنووسی ناوداری ئەڵمانی کە لە یانە باڤارییەکە نزیکە، پشتڕاستی کردەوە کە مێرێنگی لە نزیکەوە چاودێری دۆخی ئۆلیسێ دەکات، بەڵام ریال مەدرید لەم کێبڕکێیەدا بەتەنیا نییە.

فالک ئاماژەی بەوەش کردووە، پێپ گواردیۆلا، راهێنەری مانچێستەر سیتی، سەرسامیی خۆی بۆ تواناکانی مایکڵ ئۆلیسێ دەربڕیوە و دەیەوێت بیباتە ریزەکانی مانچێستەر سیتی، بەڵام ئەوەی بابەتی گواستنەوەکەی گەرمتر کردووە، تێوەگلانی کیلیان ئێمباپێیە. 

بەگوێرەی ئەو رۆژنامەنووسە، ئێمباپێ یەکێکە لە گەورەترین پاڵپشتیکارانی هێنانی ئۆلیسێ بۆ مەدرید؛ ئەستێرە فەرەنسییەکە پێیوایە ئۆلیسێی هاونیشتمانییەکەی لەڕووی کاریگەری و یەکلاکەرەوەیی لە ناوچەی سزای رکابەران، لە ڤینیسیۆس جۆنیۆر باشترە، هەر بۆیە گوشار دەخاتە سەر کارگێڕیی یانە شاهانەکە بۆ تەواوکردنی ئەم گرێبەستە.

سەرەڕای هەموو ئەم هەوڵانە، بایرن میونشن بەئاسانی دەستبەرداری ئۆلیسێ نابێت، بەتایبەت کە ئێستا بووەتە یەکێک لە کۆڵەکە سەرەکییەکانی پێکهاتەکەی ڤینسێنت کۆمپانی.

نرخی بازاڕیی ئەم ئەستێرە لاوە فەڕەنسییە بە 130 ملیۆن یۆرۆ دەخەمڵێندرێت، ئەمەش وادەکات هەر یانەیەک بیەوێت بیگوازێتەوە، پێویستە بڕە پارەیەکی خەیاڵی تەرخان بکات.

ماوەی داهاتوو بۆ ریال مەدرید چارەنووسساز دەبێت؛ هەم بۆ دیاریکردنی داهاتووی ڤینیسیۆس جۆنیۆر و هەم بۆ یەکلاکردنەوەی ململانێ گەورە ئەوروپییەکە لەسەر مایکڵ ئۆلیسێ، کە پێدەچێت بازاڕی هاوینەی داهاتوو بە گەرمی دەستپێبکات.