تیروپشکی مۆندیالی 2026 راکێشرا؛ عێراق سەربکەوێ بەرامبەر فەرەنسا، نەرویج و سەنیگال یاری دەکات

 

 

بەگوێرەی تیروپشکەکە، ئەگەر هەڵبژاردەی عێراق بتوانێ لە یارییەکانی پاشکۆدا سەرکەوتن بەدەستبهێنێت، ئەوا رووبەڕووی کۆمەڵەیەکی ئاگرین و دژوار دەبێتەوە کە پاڵەوانی پێشووتری جیهان فەرەنسا، پاڵەوانی ئەفریقا سەنیگال و هەڵبژاردەی بەهێزی نەرویجی تێدایە.

 

رێوڕەسمەکە رۆژی هەینی 05-12-2025 لە ناوەندی جۆن ئێف کێنەدی لە واشنتن بەڕێوەچوو و چەندین کەسایەتیی ناسراو ئامادەی بوون، لەوانە دۆناڵد ترەمپ، سەرۆکی ئەمریکا و لەلایەن ئەکتەری دیاری کۆمیدی کێڤن هارتەوە پێشکێش کرا. بۆ یەکەم جار لە مێژوودا، پرۆسەی تیروپشکەکە بە سیستمی ژیریی دەستکرد کرا.

 

 

هەڵبژاردەی عێراق یەکێکە لەو 22 هەڵبژاردەیەی هێشتا بە فەرمی بلیتی مۆندیالی بەدەستنەهێناوە و چارەنووسی بەستراوەتەوە بە یارییەکانی پاشکۆوە کە بڕیارە لە مانگی ئاداری داهاتوودا بەڕێوەبچن. 

 

بەگوێرەی تیروپشکی پاشکۆکان، عێراق سەرەتا رووبەڕووی براوەی یاریی نێوان سورینام و بۆلیڤیا دەبێتەوە. ئەگەر عێراق بتوانێ لەو یارییەدا سەرکەوتن بەدەستبهێنێ، ئەوا راستەوخۆ دەگاتە قۆناخی کۆمەڵەکانی جامی جیهانی و دەکەوێتە کۆمەڵەی نۆیەمەوە، کە بەیەکێک لە قورسترین کۆمەڵەکان دادەنرێت.

 

 

فەرەنسا (هەڵگری ناسناوی 2018 و پلەی دووەمی 2022)

 

سەنیگال (پاڵەوانی ئەفریقا و خاوەنی یاریزانی بەتوانا)

 

نەرویج (خاوەنی ئەستێرەکانی وەک ئێرلینگ هالاند و مارتن ئۆدیگارد)

 

براوەی پاشکۆی 2 (عێراق / سوورینام / بۆلیڤیا)

 

 

تیروپشکەکە چەندین کۆمەڵە و رووبەڕووبوونەوەی بەهێزی دیکەی لێکەوتەوە:

ئەرجەنتین، پاڵەوانی 2022، لە کۆمەڵەی J شانبەشانی نەمسا، جەزائیر و ئوردن یاری دەکات.

 

بەرازیل لە کۆمەڵەی C رووبەڕووی مەغریب دەبێتەوە، کە ئەسپی رەشی مۆندیالی رابردوو بوو.

 

ئینگلتەرا و کرواتیا، دوو رکابەری دێرینی ئەورووپا، جارێکی دیکە لە کۆمەڵەی L پێکەوەن.

 

ئیسپانیا لە کۆمەڵەی H لەگەڵ ئۆرۆگوای و سعودیەدا کۆبووەتەوە.

 

ئەمریکای میواندار لە کۆمەڵەی D شانبەشانی ئوسترالیا و پاراگوای یاری دەکات.

 

 

جامی جیهانیی 2026، کە درێژترین وەشان دەبێت لە مێژوودا و بۆ 39 رۆژ بەردەوام دەبێت، چەندین گۆڕانکاریی مێژوویی بەخۆیەوە دەبینێت:

 

ژمارەی هەڵبژاردەکان: بۆ یەکەمجار 48 هەڵبژاردە بەشداری دەکەن، کە بەسەر 12 کۆمەڵەی چوار تیمیدا دابەش کراون.

 

ژمارەی یارییەکان: لە 64 یارییەوە بۆ 104 یاری زیاد دەکات. 78 یاری لە ئەمریکا، 13 لە کەنەدا و 13 لە مەکسیک دەکرێن.

 

سیستمی پاڵاوتن: یەکەم و دووەمی هەر 12 کۆمەڵەکە (24 هەڵبژاردە)، لەگەڵ 8 باشترین هەڵبژاردەی پلەی سێیەم، سەردەکەون بۆ قۆناخێکی نوێ کە قۆناخی 32ـە.

 

خەڵاتە داراییەکان: کۆی گشتیی خەڵاتە داراییەکان بەشێوەیەکی بەرچاو زیادیکردووە و گەیشتووەتە 652 ملیۆن دۆلار (مۆندیالی پێشوو 440 ملیۆن بوو).

 

هەڵبژاردەی براوە بڕی 50 ملیۆن دۆلار وەردەگرێت (پێشتر 42 ملیۆن بوو).

 

پلەی دووەم: 35 ملیۆن دۆلار.

 

پلەی سێیەم: 32 ملیۆن دۆلار.

 

تەنانەت ئەو هەڵبژاردانەی لە قۆناخی کۆمەڵەکاندا دەردەکرێن، بڕی 9 ملیۆن دۆلار وەردەگرن.

 

یاریی کردنەوەی پاڵەوانێتییەکە رۆژی 11ی حوزەیرانی 2026 لە نێوان مەکسیک و ئەفریقای باشوور دەبێت و یاریی کۆتاییش رۆژی 19ـی تەممووز لە یاریگەی مێت لایف لە نیویۆرک بەڕێوەدەچێت.

 

 

 

کۆمەڵەی A: مەکسیک، کۆریای باشوور، ئەفریقای باشوور، براوەی پاشکۆی D

 

کۆمەڵەی B: کەنەدا، سویسرا، قەتەر، براوەی پاشکۆی A

 

کۆمەڵەی C: بەرازیل، مەغریب، سکۆتلاند، هایتی

 

کۆمەڵەی D: ئەمریکا، ئوسترالیا، پاراگوای، براوەی پاشکۆی C

 

کۆمەڵەی E: ئەڵمانیا، ئیکوادۆر، کۆتدیڤوار، کوراساو

 

کۆمەڵەی F: هۆڵەندا، ژاپۆن، تونس، براوەی پاشکۆی B 

 

کۆمەڵەی G: بەلجیکا، ئێران، میسر، نیوزیلاند

 

کۆمەڵەی H: ئیسپانیا، ئۆرۆگوای، سعودیە، کابۆ ڤێردی

 

کۆمەڵەی I: فەرەنسا، سەنیگال، نەرویج، براوەی پاشکۆی 2 (نێودەوڵەتی)

 

کۆمەڵەی J: ئەرجەنتین، نەمسا، جەزائیر، ئوردن

 

کۆمەڵەی K: پۆرتوگال، کۆڵۆمبیا، ئۆزبەکستان، براوەی پاشکۆی 1 (نێودەوڵەتی)

 

کۆمەڵەی L: ئینگلتەرا، کرواتیا، پەنەما، گانا

 

تێبینی: عێراق لە پاشکۆی 2 دایە، رووبەڕووی یەکێک لە سوورینام و بۆلیڤیا دەبێتەوە؛ ئینجا ئەگەر سەرکەوت، رووبەڕووی فەرەنسا، سەنیگال و نەرویج دەبێتەوە.