رووداو دیجیتاڵ
سەرۆکی هەرێمی کوردستان پیرۆزبایی لە یانەکانی دهۆک و زاخۆ دەکات بەبۆنەی بەدەستهێنانی پلەی یەکەم و دووەمی جامی عێراق و دەڵێت، "هەر هەبن و هەر سەرکەوتوو بن."
بەبۆنەی بەدەستهێنانی پلەی یەکەم لەلایەن یانەی دهۆک و پلەی دووەم لەلایەن یانەی زاخۆ لە جامی عێراق، نێچیرڤان بارزانی، سەرۆکی هەرێمی کوردستان پەیامێکی لە لاپەڕەی فەرمیی خۆی لە فەیسبووک بڵاوکردەوە و دەڵێت، "لە دڵەوە و بە گەرمی پیرۆزبایی لە یانەی دهۆک دەکەم کە بووە یەکەم و جامی عێراقی بەدەستهێنا، هەروەها پیرۆزبایی لە یانەی زاخۆ دەکەم کە پلەی دووەمیان بەدەستهێنا، دەستخۆشییان لێدەکەم و هیوای سەرکەوتنی بەردەوامیان بۆ دەخوازم."
سەرۆکی هەرێمی کوردستان دەشڵێت، "گەیشتنی هەردوو یانەکانی دهۆک و زاخۆ بەم ئاستە، جێی دڵخۆشی و شانازیی هەموو کوردستانییانە. هیوادارم ئەم ئاست و سەرکەوتنە گیانی وەرزشی لە کوردستان و عێراق بەگشتی بەهێز بکات."
لە کۆتایی پەیامەکەشیدا، رووی قسەکانی لە هەردوو یانە دەکات و دەڵێت، "هەر هەبن و هەر سەرکەوتوو بن."
تاوەکو ئێستا زاخۆ و دهۆک 23 جار رووبەڕووی یەکدی بوونەتەوە، لە 16 یاریی یەکسانبوون، زاخۆ دوو بردنەوە و دهۆکیش بە بردنەوەکەی ئەمشەوەوە 8 بردنەوەی هەیە.
جامی عێراق لە وەرزی 1948-1949ـوە بەڕێوەدەچێت و تاوەکو ئەمڕۆ هیچ یانەیەکی کوردستان نەببووە پاڵەوانی. یانەی هەولێر وەکو تاکە یانەی کوردستان لە وەرزی 2022-2023 گەیشتە یاریی کۆتایی و بە ئەنجامی 1-0 بە قووە جەوییە دۆڕا.
هەر یانەیەک ببێتە پاڵەوان، لە وەرزی نوێ بەشداری لە یانە پاڵەوانەکانی ئاسیا - 2 دەکات. لەلایەکی دیکەوە هەردوو ئەو یانەیەی گەیشتوونەتە کۆتایی یاریی جامی عێراق، بەشداریی لە پاڵەوانێتیی جامی سوپەری عێراق دەکەن لە وەرزی داهاتوو.
یانەی زەوڕا زۆرترین جار ئەو ناسناوەی بەدەستهێناوە کە 16 جارە. وەرزی رابردوو یانەی شوڕتە توانی بە گۆڵێکی خاوێن لە قوە جەوییە بباتەوە و جامە زێڕینەکە بەرزبکاتەوە.
تاوەکو ئێستا یانەیەک توانیبێتی زۆرترین گۆڵ لە یارییەکی ئەو پاڵەوانێتییە بکات، یانەی جەیش بووە کە لە ساڵی 1987 توانی 14 گۆڵ لە بابل بکات.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ