یانەی هەولێر بۆ رووداو: سکاڵا لەسەر سەمەد جەوهەر تۆمار دەکەین

دوای ئەوەی یانەی هەولێر لە خولی کوردستان بە چوار گۆڵ بەرامبەر بە گۆڵێک بە یانەی سەیدسادق دۆڕا، سەمەد جەوهەری راهێنەری تیپەکە نامەی دەستلەکارکێشانەوەی پێشکەشی سەرپەرشتیاری تیپەکە کرد، بەڵام دەستەی کارگێڕیی یانەی هەولێر بە کۆی دەنگ دەستلەکارکێشانەوەکەی قبوول نەکرد.

دیدار حامد، سەرپەرشتیاری تیپی تۆپی پێی یانەی هەولێر بۆ خولی کوردستان، بە رووداوی راگەیاند، سەمەد جەوهەر هێشتا راهێنەری تیپەکەمانە و قبوڵمان نییە ئەو لە یانەکەمان بڕوات، کێشەکانی تیپەکە ئاسانن و دەتوانین بۆ یارییەکانی داهاتوو چارەسەریان بکەین.

دیدار حامد، ئەنجامە خراپەکانی یانەکەی بۆ هەڵەی تاکەکەسی یاریزانان گەڕاندەوە، و گوتی "ئەگەر چەند هەڵەیەکی بچووک نەبان ئێستا دۆخی تیپەکەمان لە ریزبەندی خولی کوردستان باشتردەبوو".

لەبارەی راهێنەری یانەکەیانەوە، دیدار حامد بۆ رووداو دووپاتی لەوە کردەوە کە سەمەد جەوهەر بەرپرسیاریەتییەکی لەسەر شانە و دەبێت بۆ یاریی داهاتوویان وەک راهێنەر ئامادەبێت و لەو بارەیەوە  گوتی "ئەگەر لە یاریی داهاتوودا سەمەد جەوهەر راهێنەراییەتی تیپەکە نەکات ئەوا لە رووی یاساییەوە رووبەڕووی بەرپرسیاریەتی دەبێت، و ئەوکات ئێمە لای دادگا و یەکێتێی تۆپی پێی کوردستان سکاڵای لەسەر تۆمار دەکەین، ئەگەرچی ئێمە نامانەوێت کارەکە بگاتە ئەو ئاستە".

تۆری میدیایی رووداو، پەیوەندی بە سەمەد جەوهەری راهێنەری دەستلەکارکێشاوەی تیپی تۆپی پێی یانەی هەولێر لە خولی کوردستانەوە کرد و ئەو دووپاتیکردەوە کە ئەمە بریاری کۆتاییە و بەهیچ شێوەیەک لێی پاشگەزنابێتەوە. 

سەمەد جەوهەر گوتی "من و دەستەی راهێنەران و کاڕگێڕیی یانەکە هەموومان بەرپرسین لەم دۆخەی هەولێر، بەڵام کارگێڕیی هەولێر نیازپاک نین لە رەتکردنەوە و قبوڵنەکردنی دەستلەکارکێشانەوەکەم، ئەوان ئەو بڕیارەی منیان بەدڵەو دڵخۆشن کە من وازم لە پۆستەکەم هێناوە".

سەمەد جەوهەر زیاتر بە رووداوی گوت "ئەوان ئازادن چۆن مامەڵە لەگەڵ ئەم بارودۆخە دەکەن، جا چ لە رێگەی دادگاوە بێت یان یەکێتیی تۆپی پێی کوردستانەوە، چونکە لە کۆتاییدا ئەوەی راست بێت ئەو سەردەکەوێت".

هەروەها گوتیشی "ئەوەی ئێستا کارگێڕیی یانەکە دەیکەن تەنیا نمایش و خۆدەرخستنە، بۆ ئەوەی ئەوان لە بەرامبەر هاندەران و شەقامی وەرزشیدا من بە خراپ نیشان بدەن، لە کاتێکدا ئەوان پیلانگێڕی زۆریان لە دژی من کردووە".