رووداو پرسی ئۆتۆنۆمی کوردانی رۆژئاڤا لەگەڵ سەرۆکی ئەنجوومەنی ئاسایش تاوتووێ دەکات

 

ساموێل ژبۆگار، نوێنەری سلۆڤینیا و سەرۆکی ئەنجوومەنی ئاسایش بۆ ئەم مانگە، لە وەڵامی پرسیاری رووداو سەبارەت بە داواکاریی ئۆتۆنۆمی لەلایەن کورد، درووز و عەلەوییەکانەوە گوتی: "ئەمە پرسێکە دەبێت سووریا خۆی بڕیاری لەسەر بدات و پڕۆسەکە دەبێت بە خاوەندارێتیی سووریا بێت."

 

سەبارەت بە نیگەرانییەکانی کورد لە رژێمی نوێ و مێژووی بێبەشکردنیان لە مافی هاووڵاتیبوون، ژبۆگار ئاماژەی بەوە دا، کە ئەوان لە سەردانەکانیاندا هانی گشتگیری و چارەسەرکردنی گلەییەکان دەدەن و گوێ لە هەموو لایەک دەگرن، بەڵام خۆیان بەدوور دەگرن لە دەستوەردان و دیاریکردنی شێوازی حوکمڕانی. هەروەها جەختی کردەوە، کە "چارەسەرەکان دەبێت لە ناوخۆوە بدۆزرێنەوە"، چونکە ئەزموونەکان دەریانخستووە ئەو چارەسەرانەی لە دەرەوە بۆ وڵاتان هاتوون، سەرکەوتوو نەبوون.

 

 

 

ساموێل ژبۆگار: نەخێر، پێموایە ئەمە پرسێکە دەبێت سووریا خۆی بڕیاری لەسەر بدات. پڕۆسەی سیاسی لە ناوخۆی سووریا دەبێت بە سەرکردایەتیی سووریا و بە خاوەندارێتیی سووریا بێت. ئێمە وەکو سلۆڤینیا لەگەڵ ئەوە نین، کەسێک لە دەرەوە ئامۆژگاریی سووریا بکات، کە چی بکات. پێشموایە دەبێت هان بدەین و هانیش دەدەین کاتێک دەچینە سووریا، کە [پرۆسەکە] گشتگیر بێت و چارەسەر بۆ هەموو ئەو ناڕەزایی و گلەییانە بدۆزرێتەوە، کە لە وڵاتەکەدا هەن. بەڵام بە دڵنیاییەوە نابێت ئێمە ئەو کەسە بین کە ئامۆژگاری بکەین کام رێچکەیە بگیرێتە بەر. 

 

 

ساموێل ژبۆگار: پێموایە کاتێک دەچینە سووریا لەگەڵ هەمووان کۆدەبینەوە. بۆیە گوێ لە بۆچوونی هەمووانیش دەگرین. بەڵام من خۆم بەدوور دەگرم لە دەربڕینی را و بۆچوون لەسەر پرسێکی ناوخۆیی وڵاتێکی دیکە. وەک گوتم، دەتوانین هەمیشە هاندان و پشتیوانی پێشکێش بکەین، بەڵام دەبێت چارەسەرەکە لە ناوخۆوە بێت. ئێمە حاڵەتی زۆرمان بینیوە کە چارەسەرەکان لە دەرەوە هاتوون و سەرکەوتوو نەبوون، بۆیە پێموایە کاتی ئەوەیە... پێموایە باشتر دەکەین ئەگەر خۆمان بەدوور بگرین لە دەستوەردان لە کاروباری ناوخۆیی [وڵاتانی دیکە]. بێگومان دەتوانین ئاماژە بە پرسەکان بکەین، کێشەکان بخەینە روو و پرسیار بکەین، بەڵام چارەسەرەکان دەبێت لە ناوخۆوە بدۆزرێنەوە.