بەهۆی هێرشەکانی ئێرانەوە نرخی نەوت بۆ سەرووی 80 دۆلار بەرزبووەوە

 

 

لە سەرەتای مامەڵەکانی رۆژی دووشەممە لە بازاڕەکانی ئاسیا، نرخی یەک بەرمیل نەوتی برێنت گەیشتە سەرووی 80 دۆلار، بەڵام دواتر بۆ 79 دۆلار دابەزی. ئەمەش لە کاتێکدایە رۆژی هەینی پێش دەستپێکردنی هێرشەکان، نرخەکەی 72.87 دۆلار بوو.

 

زیادبوونی ئاڵۆزییەکان مەترسییەکی جددیی لەسەر گەرووی هورمز دروستکردووە، کە نزیکەی %20ی نەوتی جیهانی پێدا تێپەڕ دەبێت. هەرچەندە باس لەوە دەکرێت کە هەندێک کەشتیی چینی و ئێرانی هێشتا بەوێدا تێپەڕ دەبن، بەڵام زۆربەی کۆمپانیا گەورەکانی گواستنەوەی دەریایی بڕیاریان داوە گەشتەکانیان لەو رێگەیەوە رابگرن.

 

ئامینە بەکر، سەرۆکی بەشی توێژینەوەی رۆژهەڵاتی نێوەڕاست لە دامەزراوەی (Kpler) دەڵێت: "تێچووی دڵنیایی بە شێوەیەکی خەیاڵی بەرزبووەتەوە و پێشبینی دەکرێت نرخی نەوت بگاتە 90 دۆلار." هاوکات خۆرخی لیۆن، شرۆڤەکار لە (Rystad Energy) ئاماژە بەوە دەکات، داخستنی گەرووی هورمز واتە بڕانی 8 بۆ 10 ملیۆن بەرمیل نەوت لە بازاڕەکانی جیهاندا لە رۆژێکدا.

 

جگە لە نەوت، پێشبینی دەکرێت نرخی گازیش بەرزبوونەوەی هاوشێوە بەخۆیەوە ببینێت، بەتایبەت کە قەتەر هەناردەکارێکی سەرەکیی گازی سروشتییە و کەوتووەتە ناوچەی ئاڵۆزییەکان. شارەزایان دەڵێن ئەم دۆخە مەترسیی هەڵاوسان و پاشەکشەی ئابووریی جیهانی لێدەکرێت.

 

ئێریک دۆر، ئابووریناس لە پاریس دەڵێت: "ئەگەر ئەم دۆخە تەنیا سێ رۆژ بخایەنێت مەترسییەکی ئەوتۆی نییە، بەڵام ئەگەر درێژە بکێشێت، دەبێتە هۆی پاشەکشەیەکی گەورەی ئابووری."

 

لە بازاڕی پشکەکانیشدا، پێشبینی دەکرێت پشکی کۆمپانیاکانی بەرگری و چەک بەرزببنەوە، بەڵام کەرتی فڕۆکەوانی، گواستنەوەی دەریایی و گەشتیاری زەرەرمەندی یەکەم دەبن و پشکەکانیان دادەبەزن.