گەردەلوول و باهۆز لە ویلایەتە یەکگرتووەکانی ئەمریکا بوونە هۆی گیانلەدەستدانی 21 کەس

گوتەبێژی ئاژانسی بەڕێوەبردنی باری لەناکاوی ویلایەتی تێنیسی، ئەمڕۆ (یەکشەممە، 2ـی نیسانی 2023) کە ویلایەتەکەی بەر شەپۆلێکی تووندی باهۆز کەوتووە، گیانلەدەستدانی حەوت کەسی بەهۆی باهۆزەوە پشتڕاستکردەوە. 

 

هاوکات، لە رۆژی هەیینییەوە، 14 کەسی دیکە لە ویلایەتەکانی ئارکانساس، میسیسیپی، ئالاباما، ئیندیانا و ئیلینۆی بەهۆی باهۆز و گەردەلوولەوە گیانیان لەدەستداوە. 

 

سارا هەکابی ساندەرس، حاکمی ویلایەتی ئارکانساس بەهۆی خراپیی دۆخی کەشوهەواوە باری لەناکاوی راگەیاندووە و گوتی، قسەی لەگەڵ جۆ بایدن، سەرۆکی ئەمریکا کردووە بۆ ئەوەی هاوکاریی فیدراڵی بە ویلایەتەکە بگەیێندرێت. 

 

هاوکات، ئاژانسی کەشوهەوای نیشتمانی هۆشداریی گەردەلوولی لە ژمارەیەک ویلایەت داوە؛ لە ویلایەتی ئایۆوا لە باکوورەوە تاوەکو ویلایەتی میسیسیپی لە باشووری ئەمریکا.

 

چەند دیمەنێک لە تۆڕە کۆمەڵایەتییەکان بڵاوکرانەوە، کە تێیدا دەردەکەوێت باهۆز و گەردەلوولی بەهێز درەخت، ستوونی کارەبا و خانووەکان تێکدەشكێنێت. ئاژانسی کەشوهەوای نیشتمانیش دەڵێت خێرایی با گەیشتووەتە 100 کیلۆمەتر لە کاژێرێکدا. 

 

بەگوێرەی بەرپرسانی ئەمریکا، 610 هەزار ماڵ بەهۆی باهۆزەکەوە کارەبایان بڕاوە، کە زۆربەیان لە ویلایەتی ئۆهایۆ و پەنسلڤانیا بوون.

 

گەردەلوولی بە‌هێز لە ئەمریکا باوە، بەتایبەتیش لە ویلایەتەکانی نێوەڕاست و باشووری وڵاتەکە؛ لە کۆتایی ساڵی 2021ـدا 80 کەس بەهۆی گەردەلوولەوە لە ویلایەتی کەنتاکی گیانیان لەدەستدا.