دەقی هەڤپەیڤینەکە:
هێمن عەبدوڵڵا: چەند هەفتەیەکە گۆرانییەکی کوردی لە جیهان دەنگیداوەتەوە، گۆرانی کورمانجی هەڕە گولێ، لە تیکتۆک و ئینستگرام و فەیسبووک و لە ناو ماڵ و ناو ئۆتۆمبێڵ و سەر شەقامەکان و لە هەر شوێنێک گوێگری ئەو گۆرانییەن. زۆرکەس دەڵێن چونکە بە ژیری دەستکرد دروستکراوە شتێکی سەرەنجڕاکێش نیە، بەڵام ئەوانیش گوێ لەو گۆرانییە دەگرن. دەکرێت زۆرکەس هەبن بیانەوێت بزانن کێ ئەو گۆرانییەی دروست کردووە. ئایا گەنجێک لە پشتی کۆمپیوتەرێکەوە شتێکی نووسیوەو ئەو گۆرانییەی لێ دەرچووە، کە دەکرێت هەر کەسێک ئەو بکات، یاخود هونەرێک لەپشتی ئەو گۆرانیەدایەو چیرۆکێکی هەیە. ئەمڕۆ ئێمە هاتووینەتە لای ئەو هونەرمەندەی کە ئەو گۆرانییەی دروست کردوە. کورمانجی هەڕێ گولێ ئەو گۆرانییەی کە لە جیهاندا نەک تەنها کورد میللەتانی دیکەش گوێی لێدەگرن. پایکس ناوی هونەرییەتی و دواتر دەزانن کە ناوی خۆی چییە و وەک دەبینن بە ماسک و ئاڵای کوردستان و ئەڵمانیای لەسەر شانی داوە. ئەمڕۆ میوانی ئێمەیەو ئێمەش میوانی ئەوین. ئەم هەردوو مێرین ئەز نکارم بێژم کورمانجی هەڕێ گولێ. ئەزێ بێژم کورمانجی هەڕێ برێ.
پایکس: ئێوارە باش براکەم. من ناوم پایکسەو خەڵکی دێرسمم. کورمانجییەکەم زۆر باش نییە، بەڵام هەوڵ دەدەم کوردی و ئەڵمانی تێکەڵ بکەم. چونکە لێرە گەورە بووم، خێزانەکەم خەڵکی ناوچەیەک بوون کە زۆر ڕووبەڕووی تواندنەوە (ئاسیمیلاسیۆن) بوونەتەوە، بەڵام هەوڵمداوە کە ڕەگ و ڕیشەی کوردی خۆم لەبیر نەکەم.
هێمن عەبدوڵڵا: تۆ کارێکی گەورەت بۆ زمانی کوردی کردووە. زۆر کەس کە نەیانویستووە بە کوردی قسە بکەن، ئێستا گوێ لە گۆرانییەکەت دەگرن و وشەی "کورمانجی" دەڵێنەوە. هەستت چۆنە؟
پایکس: سەرەتا شۆک بووم، بەڵام زۆر دڵخۆشم. لەو رۆژەوەی گۆرانییەکە بڵاوبووەوە، لێدانی دڵم خێرا بووە. زۆر کاریگەر بووم بەو هەموو نامە جوانانەی بۆم هاتوون. سوپاسی هەموو ئەو کەسانە دەکەم کە پشتگیرییان کردین. بێگومان بەردەوام دەبین.
هێمن عەبدوڵڵا: چیرۆکی پشت گۆرانییەکە چییە؟ بیرۆکەکەت چۆن بۆ هات؟
پایکس: ئێمە بۆ ماوەیەکی زۆر گەڕاین بۆ دۆزینەوەی دەنگێکی بێخەوش و کارمان لەسەر کرد. دواتر بەدوای ناوێکدا گەڕاین: هیوا (Hiva). گۆرانی زۆرمان دروست کرد، بەڵام باشترینەکەمان هەڵبژارد و بڵاومانکردەوە.
هێمن عەبدوڵڵا: چەند کاتی خایاند؟ هەندێک دەڵێن تەنها فرمانێک (Prompt) دەدەیت بە وێبسایتێک و تەواو.
پایکس: ئەگەر ئەوەندە ئاسان بووایە، هەزاران گۆرانی لەو شێوەیە دروست دەکران. ئێمە تەنها بۆ دەنگەکە، زیاتر لە دوو هەفتە و هەموو ڕۆژێک چەندین کاتژمێر گەڕاین و تاقیمان کردەوە. گۆرانی Kurmancî Her e Gulê شەش ڤێررژنمان لێ دروست کرد و ئینجا ئەوەمان هەڵبژارد کە بڵاومانکردەوە.
هێمن عەبدوڵڵا: شەش جۆرتان دروست کردبوو بۆچی ئەوەتان هەڵبژارد؟
پایکس: چونکە ئەوە ڕاستەوخۆ چووە دڵەوەو تەزوو بە لەشمدا هات کە گوێم لێگرت. هاوژینەکەم وتی: "واو، ئەمەیە!
دواتر یەکسەر لە تیکتۆک بڵاومانکردەوە.
هێمن عەبدوڵڵا: بڵاوتکردەوە و وتت: "با ببینین کێ دەیبینێت." گوتت ئێوارەی یەکشەممە کە بڵاوتکردەوە شۆک بوویت، باسی ئەوەمان بۆ بکە. چیرۆکی شۆکبوونەکەمان بۆ باس بکە؟
پایکس: لە ژوورەکەم بووم، هاوڕێ کچەکەم بانگیکردم و گوتی سەیرکە: "ئەپدەیتم کردەوە و کتوپڕ بوو بە ٥٠ هەزار بینەر!" دوای کەمێکی تر دیسان ئەپدەیتمان کردەوە، ١٠ هەزار بینەری تری بۆ هات. ئەو کات زانیمان کە ئەلگۆریتمەکە کاری خۆی کردووە. هەمووان بڵاویان دەکردەوە. خەڵک دەیانپرسی: هیوا کێیە؟ خەڵکی کوێیە؟ ئایا هیوا کچە یان من هیوام؟ وەک لافاوێک بەسەرماندا هات.
هێمن عەبدوڵڵا: کە پێدەکەنیت من تۆ نابینم، بۆچی ماسک دەپۆشیت؟ چیرۆکی پشت ئەمە چییە؟
پایکس: نامەوێت دەموچاوم نیشان بدەم تا ئەو کاتەی دەگەم بە ئامانجەکانم لە ژیاندا. یەکێک لەو ئامانجانە ئەوەیە کە لە ئاشتیدا بژیم و چیتر نەبینم گەلەکەم یان گەلانی تر دەچەوسێنرێنەوە. تا ئەو کاتە دەموچاوم نیشان نادەم.
هێمن عەبدوڵڵا: ئایا نزیکە کە ئاشتی بێت؟
پایکس: هیوادارم ئاشتی بەم زووانە بێت. هەموو ڕۆژێک هیوای بۆ دەخوازم. هەروەها لە ڕێگەی پڕۆژەی 144 دەمانەوێت ببینە دەنگی ئەو کەسانەی کە دەنگیان نابیسترێت.
هێمن عەبدوڵڵا: ئایا بڕیارتان ئەوە بوو کە بە کورمانجی موزیک و گۆرانی دروست بکەن یاخود بە زمانەکانی دیکەش، چونکە کارتان بە زمانی ئینگلیزیش هەن؟
پایکس: بێگومان بە پلەی یەکەم بە کوردی، بەڵام ویستمان بە ئینگلیزیش موزیک دروست بکەین، چونکە زمانێکی جیهانییە. نەک تەنها کۆمەڵگەی کوردی، بەڵکو دەمانەوێت دەنگمان بگاتە هەموو جیهان.
هێمن عەبدوڵڵا: خانەوادەکەشت پاشخانێکی کوردی و هونەریان هەیە، کوردبوون چەندە بۆت گرنگە؟
پایکس: زۆر گرنگە. زمان، کلتوور و ئایین و گەلەکەمان ڕاوەدوونراون و چەوسێنراونەتەوە. من بە ناوی Barış Korkmaz (باریش کۆرکمەز) لەدایک بووم – باریش واتە ئاشتی (Aşitî). دەمەوێت ڕێز لە ناوەکەم بگرم. بیری نیشتمانەکەم و زەردەخەنەی گەلەکەم دەکەم چونکە هەزاران ساڵە راوەدوو دەنرێین. دەمەوێت لەوەدا بەشداربم و شتێک بکەم، دەمەوێت بە کوردی بژیم و ژیان و خواردن و خۆشەویستیم هەمووی کوردی بێت. کوردستان واتا ئاشتی.
هێمن عەبدوڵڵا: پڕۆژەکەتان تەنها گۆرانی کورمانجی هەڕە گولێ بوو، یان شتی دیکەش هەیە هێشتا دروستی دەکەن؟
پایکس: بێگومان. لەژێر ناوی هیوا هەمیشە گۆرانی و پرۆژەی نوێمان دەبێت. بەم زووانە گۆرانییەکی نوێ بە ناوی Zindan u Jiyan بڵاودەبێتەوە. هەروەها پڕۆژەی زۆر گەورەمان لەپێشە کە هێشتا ناتوانم زانیاری زۆریان لەسەر بدەم. بەڵام کە تەواوبوون بێگومان ئاگادارتان دەکەینەوە.
هێمن عەبدوڵڵا: ئایا بۆ تۆ موزیک وەک کارێکی پڕۆفیشناڵ دروست دەکەیت یان هەروەک هیوایەتێکە، چونکە رەنگە زۆرکەس وابزانن کە ئەوە کاری گەنجێکی پشت کۆمپیوتەر بێت؟ من دەموچاوت نابینم بەڵام دەزانم کە پێدەکەنىت.
پایکس: من لە تەمەنی ١٤ ساڵییەوە لەسەر ستەیجم. پێنج ئامێری موزیک دەژەنم: تەمبوور، پیانۆ، دەهۆڵ ، گیتار، عود. قوتابخانەیەکی موزیکم هەبوو کە زیاتر لە ٢٠٠ قوتابی تێدا بوو. لە ئاهەنگی هاوسەرگیری، لە یانەکان و لە گەشتە هونەرییەکاندا موزیکم ژەنیوە، زیاتر لە ٥٠٠ گۆرانیم بۆ هونەرمەندانی ئاسایی و ناسراو و پیرو گەنج دروست کردووە. بێگومان ئەمە تەنها کاری کلیکێک نیە بەڵکو ئەزموونێکی دوورو درێژە.
هێمن عەبدوڵڵا: لەگەڵ کام لە هونەرمەندە گەورەکان کارتکردووە؟
پایکس: لەگەڵ خوالێخۆشبوو خەتەر کارمکردووەو گۆرانیم بۆ دروست کردووە. هەروەها لەگەڵ هەریەکە لە ئازاد، مەرۆ، کاپۆ، هافتبفێل، کۆنترا کاو کاپیتاڵ برا کارمکردووە.
هێمن عەبدوڵڵا: ئەو ناوانە هەموویان هونەرمەندی زۆر ناوداری ئەڵمانیان، ئەوەی ئەمریکیەکەش ئەستێرەیە لە هیپۆپ، تەنها بۆ گۆرانی کارتکردووە یاخود بۆ فیلمە جیهانییەکانیش موزیکت دروست کردووە؟
پایکس: بەڵێ، بۆ فیلمێکی گەورە لە ئەڵمانیا بە ناوی Haps کە ئەمساڵ نمایش دەکرێت. باسی Zindan u Jiyan دەکات.
هێمن عەبدوڵڵا: لە کوێ لە نێتفلیکس پیشاندەدرێت؟
پایکس: هێشتا دیار نیە لە نێتفلیکس یان لە ئەمازۆن پیشاندەدرێت، من سەرپەرشتیاری موزیک بووم و تەواوی موزیکی فیلمەکە و کەمپەینەکەم بەڕێوە بردووە. فیلمەکە نیشانی دەدات کە مرۆڤ دەبێت هەوڵ بدات ڕێگەی ڕاست بگرێتە بەر و ببێتە دەنگ بۆ ئەوانەی کە دەنگیان ناگات.
هێمن عەبدوڵڵا: هەندێک موزیسیان لە ژیریی دەستکرد دەترسن یان بە هونەری ڕاستەقینەی دانانێن. تۆ موزیسیانێکی بە ئەزموونی و هەر بەکاریشی دەهێنیت. بۆچی ژیریی دەستکرد بۆ هونەر باشە؟
پایکس: من بە شێوەیەکی تر دەبینم. هەرکاتێک شتێکی نوێ هات – وەک تەلەفزیۆن یان ئایفۆن – دەوترا: "ئای خوایە، ئەمە مەترسیدارە!" بەڵام مرۆڤ بە تێپەڕبوونی کات لەگەڵی ڕادێت. جیهان دەگۆڕێت و دەبێت لەگەڵ بڕۆین، لەو کەیسەشدا داهێنان لەگەڵ هونەردا کۆدەبێتەوە. ئەگەر ئەو دەنگەی ژیریی دەستکرد دروستی کردووە کاریگەری لەسەر من هەبێت کەواتە ئەوە خەڵە گرنگ و کاریگەرەکەیە.
هێمن عەبدوڵڵا: ئەگەر بگەڕێینەوە سەر گۆرانییەکە تەنها ژیری دەستکردو پرۆمپتە یاخود مرۆڤیش دەستی تێدا هەبووەو ئامێرە موزیکیەکانیش تێیدا ژەنراوون؟
پایکس: لە پرۆژەی هیوا لە زۆربەی گۆرانییەکاندا میلۆدییەکان من خۆم دروستم کردوون، دەتوانیت خۆت میلۆدی بدەیتێ و پێی بڵێیت کە ئەوا گۆرانی بڵێ. بۆ نموونە پارچەیەکی ساز دەژەنم و دەیدەمێ و پێی دەلێم ئەو میلۆدیەم بۆ دروست بکە، هەمیشە ئەنجامێکی باشترت دەداتێ و کوالێتی باشترە لەوەی تەنها بۆی بنووسی و داوای شتێکی بە نووسین لێبکەیت.
هێمن عەبدوڵڵا: دەتوانین شتێکمان گوێ لێبێت و بیژەنیت بۆ ئەوەی کە بینەران ببینن کە پایکس ژیری دەستکردن نیە؟
پایکس: بێگومان، دەتوانن ئێوە بڕیار بدەن تەمبور یان پیانۆ بژەنم.
هێمن عەبدوڵڵا: با تەمبور بێت چونکە کوردیترە.
پایکس: ئەوە تەمبوری باوکم بوو کە کۆچی دوایی کردوە.
هێمن عەبدوڵڵا: ئەویش هونەرمەند بوو، وایە؟
پایکس: بەڵێ، ئەو مامۆستای من بوو، بۆ موزیک و ژیان. ئەو سازە تەمەنی سەرووی چل ساڵ دەبێت.
هێمن عەبدوڵڵا: لە کوێ دروست کراوە لە کوردستان؟
پایکس: ئەمە لە تورکیا دروست کراوە لە مێرسین.
هێمن عەبدوڵڵا: موزیکێک کە باوکت ژەنیویەتی یان پێکەوە ژەنیوتانە، کە بیرتبێت لە خەیاڵتدا ماوە. ئەوە کامە گۆرانی بوو، ناوی چیە؟
پایکس: باوکم ئەو پارچە موزیکەی هەمیشە دەژەنی و زۆر حەزی لێبوو.
هێمن عەبدوڵڵا: ئەو گۆرانییەی دیکە کە دەربارەی ئازادی بوو دەتوانی تۆزێکمان گوێ لێبێت.
پایکس: ئەوە میلۆدی گۆرانی زیندان و ژیانە.
هێمن عەبدوڵڵا: من قەت تێر موزیک نابم بۆیە داوای زۆر دەکەم.. زۆرکەس ڤیدیۆیان بۆ گۆرانی هەڕە گولێ دروست کرد، کام ڤیدیۆی گۆرانییەکەت زۆر سەرنجی ڕاکێشایت؟
پایکس: راستی ئەو ڤیدیۆی کە رووداو دروستی کردبوو لە هەموویان سەرنجراکێش تر بوو. بۆمان لە هەموویان خۆشتر بوو. رووداو بۆ ئێمەی کورد ژمارە یەکە، ئەوە زۆر دڵخۆشی کردم. بێگومان ڤیدیۆی دیکەش هەبوون بەڵام ئەوەی رووداو وتم واوو بەڕاستی جوانە.
هێمن عەبدوڵڵا: رووداو بۆچی بۆ تۆ ژمارە یەکە؟
پایکس: رووداو لە نێو هەموو میدیاکاندا بەهێزترین کاریان هەیە، هەمیشە هەواڵی نوێت پێدەگات و دەمێکیشە بەرنامەی دیاسپۆرا دەبینم.
هێمن عەبدوڵڵا: بۆ من زۆر سەرەنجڕاکێشە بەرنامەی دیاسۆراش دەبینیت؟
پایکس: بێگومان کاتێک خەتەر بووە میوانی بەرنامەکە و ئێمەی هونەرمەند پەیوەندیمان بەهێزەو لە ڕێگەی یەکترەوە زانیاریمان دەبێت و یەکتر ئاگادار دەکەینەوەو ئەوە بۆ ئێمە سەرەنجڕاکێشترە کە هونەرمەندێکمان لە میدیای کوردی دەرکەوێت. رەگوریشەمان وامان لێ دەکات کە کاریگەری لەسەرمان هەبێت.
هێمن عەبدوڵڵا: پەیامت بۆ کوردانی دیاسپۆرا، بەتایبەت گەنجان چییە؟
پایکس: دەبێت بەسەختی کار بکەین. دەبێت کار بۆ چاکە بکەین. زۆر کەس بە چاوێکی پڕ لە حوکمی پێشوەختە سەیری ئێمە دەکەن، بەهۆی ئایین یان ڕەگەزمانەوە. دەبێت بە زانست و خوێندن بدرەوشێینەوە، ببینە نموونەی باش و لە هەموو شوێنێک ئاشتی بەرقەرار بکەین.
هێمن عەبدوڵڵا: بۆچی ناوی "پایکس" (Paix)؟
پێکس: Paix بە زمانی فەڕەنسی واتە ئاشتی. ئەوە ناوی من و پەیامی منیشە. خۆم ناوم بارشە، بە مانای ئاشتی دێت و پاشاوی کۆرکمازە.
هێمن عەبدوڵڵا: هیوادارم جاری داهاتوو بەبێ ماسک دیدارت لەگەڵ ساز بکەین، لە ئاییندەیەکی نزیکدا بەرهەمە نوێکانت بڵاوببنەوەو ئەوکات بە ئاشتی ناوت دێنم نەوەک پایکس.