هێزی ئاسمانیی ئەمریکا ملیارێک دۆلار بۆ کڕینی فڕۆکەی جەنگیی بێفڕۆکەوان داوا دەکات

 

ئەم فڕۆکانە چین و کاریان چییە؟

 

ئەم فڕۆکانە پێیان دەگوترێت "فڕۆکەی جەنگیی هاوکار"، ئەرکی سەرەکییان ئەوەیە کە شانبەشانی فڕۆکە جەنگییە ئاساییەکان (ئەوانەی فڕۆکەوانیان تێدایە) بفرن و یارمەتییان بدەن. ئەمان دەتوانن کاری هەواڵگری بکەن، زانیاری کۆبکەنەوە، رێگریی ئەلیکترۆنی بکەن و تەنانەت راستەوخۆ هێرشیش بکەنە سەر ئامانجەکانی دوژمن.

 

 

ئەمە گۆڕانکارییەکی گەورەیە لە شێوازی شەڕی ئەمریکادا، لەبری ئەوەی سوپا تەنیا پشت بە فڕۆکە زۆر گرانبەهاکان ببەستێت کە مرۆڤ لێیان دەخوڕێت، دەیەوێت ئەم درۆنە پێشکەوتووانەش تێکەڵ بکات، چونکە:

• تێچووی دروستکردن و کڕینیان زۆر کەمترە لە فڕۆکە جەنگییە ئاساییەکان.

• مەترسییەکانی سەر گیانی فڕۆکەوانە مرۆڤەکان زۆر کەمدەکەنەوە.

• لەبەر هەرزانیی نرخەکەیان، سوپا دەتوانێت بە ژمارەیەکی زۆر و بە شێوەی پۆل لە شەڕە سەخت و درێژخایەنەکاندا بەکاریان بهێنێت.

 

 

ئێستا چەندین کۆمپانیای چەکسازی سەرقاڵی دروستکردنی نموونەی ئەم فڕۆکانەن و سوپا تاقییان دەکاتەوە بۆ ئەوەی باشترینیان هەڵبژێرێت. 

 

لە قۆناخی یەکەمدا، بەو ملیار دۆلارەی کە داواکراوە، ژمارەیەکی دیاریکراو لەو فڕۆکانە دەکڕدرێن بۆ ئەوەی ببنە یەکەمین گرووپی کارا لەنێو هێزی ئاسمانیدا.

 

بەڵام بۆ ئەوەی ئەم پرۆژەیە بەتەواوی بچێتە باری جێبەجێکردنەوە، پێویستە کۆنگرێس رەزامەندی لەسەر خەرجکردنی ئەو پارەیە بدات. ئەگەر پرۆژەکە سەربگرێت، ئەوا شێوازی شەڕی ئاسمانی بەتەواوی دەگۆڕێت، چونکە لەمەودوا ژیریی دەستکرد و تەکنەلۆجیای بێفڕۆکەوان شانبەشانی مرۆڤەکان شەڕ دەکەن.