زیلینسکی: لەسەر ئاڵوگۆڕی 1200 دیلی دیکە لەگەڵ رووسیا رێککەوتووین

 

رۆژی یەکشەممە، 3ی ئابی 2025، ڤۆلۆدیمیر زیلینسکی، سەرۆکی ئۆکراینا لەگەڵ روستەم ئومەرۆڤ، سکرتێری ئەنجوومەنی ئاسایشی نیشتمانیی ئۆکراینا و ئەندری یەرماک، سەرۆکی نووسینگەی سەرۆکایەتیی ئۆکراینا کۆبووەوە، ئەوەش بۆ گفتوگۆ لەبارەی ئەنجامی گفتوگۆکانی شاندی وڵاتەکەی و لایەنی رووسیا و جێبەجێکردنی ئەو رێککەوتنانەی لە دوایین کۆبوونەوەیان لە ئیستەنبووڵ کراون. 

 

23ـی تەممووزی 2025، شاندەکانی رووسیا و ئۆکراینا لە ئیستەنبووڵ کۆبوونەوە. پێشتریش دووجار و لە رۆژانی 16ـی ئایار و 2ـی حوزەیران لە هەمان شار بۆ گفتوگۆی ئاگربەست و چەندین پرسی دیکەی پەیوەست بە جەنگ کۆببوونەوە. 

 

سەرۆکی ئۆکراینا لە تۆڕی کۆمەڵایەتیی ئێکس لەبارەی کۆبوونەوەکە رایگەیاند: "یەکێک لەو پرسە گرنگانەی باسیان لێوە کرا بەردەوامی گۆڕینەوەی دیلەکانی جەنگ بوو. رێککەوتنێک هەیە بۆ ئاڵوگۆڕی هەزار و 200 دیلی جەنگ و کارکردن لەسەر ئەو پرسە بەردەوامە". 

 

ئازادکردنی هەزار دیلی جەنگ لە هەردوولا ئەنجامی یەکەم کۆبوونەوەی شاندی هەردوولا بوو. ئازادکردنی کەسانی بریندار و کەسانی خوار 25 ساڵ و گەڕاندنەوەی تەرمی کوژراونی هەردوولا ئەنجامی دووەم کۆبوونەوە بوو. 

 

سەرۆکی ئۆکراینا لە نووسینەکەیدا ئاماژەی بەوەش کرد، یەرماک "بەردەوامە لە هاوئاهەنگی لەگەڵ هاوبەشە گرنگەکانمان، بەتایبەت لایەنی ئەمریکی، بۆ پاڵپشتیکردنی هەوڵە دیپلۆماسییەکان و گەڕاندنەوەی سەلامەتی ئەو منداڵانەی رفێندراون و بردراونەتە رووسیا." 

 

شوباتی 2022 سوپای رووسیا هێرشیکردە سەر ئۆکراینا. هەرچەندە دۆناڵد ترەمپ، سەرۆکی ئەمریکا لە کانوونی دووەمی ئەم ساڵەوە هەوڵی ئاگربەستی نێوانیان دەدات، بەڵام تاوەکو ئێستا سەرکەوتوو نەبووە.