لە رووداوێکی تەقەکردندا لە قوتابخانەیەکی سوێد پێنج کەس برینداربوون

 

رۆژی سێشەممە، 4ـی شوباتی 2025، پۆلیسی سوێد لە راگەیێندراوێکدا گوتی: "لە قوتابخانەیەک تەقە کراوە؛ چوار کەس تەقەیان لێکراوە و نازاندرێت برینیان چەندە سەختە". 

 

دوای چەند خولەکێکی کەم لە راگەیێندراوەکە، پۆلیسی ئامارێکی دیکەی بڵاوکردەوە و گوتی، ژمارەی بریندارانی رووداوەکە گەیشتووەتە 5 کەس. 

 

جگە لەوەی ژمارەیەکی زۆر پۆلیس لە شوێنی رووداوەکە بڵاوەیان پێکراوە، ژمارەیەک ئەمبووڵانس و پزیشک رەوانەی شوێنەکە کراون. پۆلیس داوا لە خەڵکی ناوچەکە دەکات لە ماڵەکانیان نەچنە دەرەوە. 

 

پۆلیس ئاماژە بەوە دەکات، هەموو قوتابخانەکانی ناوچەکە دەرگایان لەسەر قوتابییەکانیان داخستووە و رێگەیان پێنادەن لە قوتابخانەکان بچنە دەرەوە تاوەکو پۆلیس رێگەیان پێدەدات. 

 

گونار سترۆمەر، وەزیری دادی سوێد بە میدیای وڵاتەکەی گوت: "حکومەت لە نزیکەوە لەگەڵ پۆلیس لەسەر هێڵە و چاودێری پێشهاتەکان دەکات."

 

پێکدادانی نێوان باندە رکابەرەکانی تاوان و باندەکانی بارزگانیکردن بە مادەی هۆشبەر وایکردووە، رووداوەکانی تەقەکردن لە سوێد روو لە زیادبوون بکەن. 

 

بەگوێرەی ئامارەکانی حکومەتی ئەو وڵاتە، ساڵی رابردوو 296 رووداوی تەقەکردن لەو وڵاتە هەبوون.