ترەمپ خراپترین "پەیامنێر" دەستنیشان دەکات

 

سەرۆکی ئەمریکا رووی لە رۆژنامەڤانە ئامادەبووەکان کرد و لەبارەی پەیامنێرەکەی سی ئێن ئێنەوە گوتی، "ئەو ژنێکی گەنجە، بەڵام باوەڕ ناکەم هەرگیز بینیبێتم پێبکەنێت.. 10 ساڵە دەتناسم و هەرگیز بزەم لەسەر دەموچاوت نەدیوە. دەزانی بۆچی پێناکەنیت؟ چونکە دەزانیت راست ناکەیت و دەزگایەکی زۆر بێویژدانن، دەبێت شەرم لە خۆتان بکەن."

 

پەیوەندی نێوان دۆناڵد ترەمپ و کۆڵینز مێژوویەکی درێژی لە گرژی هەیە کە لە ساڵی 2018ـەوە بە قەدەخەکردنی کۆڵینز لە کۆشکی سپی دەستیپێکرد. 

 

تاوەکو ئێستا ترەمپ چەندین جار بە تووندی هێرشی کردووەتە سەر کۆڵینز و بە "ناشیرین"، "دەبەنگ" و "خراپترین پەیامنێر" ناویبردووە، لە بەرامبەریشدا کۆڵینز بە بەردەوامی لەسەر پرسە هەستیارەکان پرسیاری لە ترەمپ کردووە. 

 

لە بەشێکی دیکەی کۆنفڕانسە رۆژنامەڤانییەکەدا پرسیار لەبارەی هەواڵی بانگهێشتکردنی بیڵ کلینتن و هیلاری کلینتن کرا بۆ لیژنەی چاودێریی ئەنجوومەنی نوێنەران بۆ وەرگرتنی گوتە لێیان.

 

ترەمپ هاوسۆزی بۆ خێزانی کلینتن دەربڕی و گوتی، "بەڕاستی پێموایە جێگەی شەرمە. من هەمیشە ئەو [بیل کلینتن]ـم خۆشویستووە. ئەویش [هیلاری]، ژنێکی زۆر بەتوانایە. پێتان دەڵێم، ئەو لە دیبەیت و گفتوگۆکاندا لە زۆر کەسی دیکە باشتر بوو. ئەو ژنێکی ژیرە."

 

ترەمپ دۆخی خێزانی کلینتنی بە دۆخی خۆی چوواند و گوتی: "پێم ناخۆشە ئەمە دەبینم، بەڵام دواتر سەیری خۆم دەکەم، ئەوان دژایەتی منیان کرد و دەیانویست هەتا ماوم لە زینداندا بمێنمەوە، بەڵام دەرکەوت من بێتاوانم، زۆر بێتاوان."