گەنجێکی هەرێمی کوردستان لە ریزەکانی سوپای رووسیا دا کوژرا

 

 

مەتین عەبدولوەهاب خدر، گەنجێکی دانیشتووی قەزای سیدەکانە لە ئیدارەی سەربەخۆی سۆران، لە 15-08-2025ـەوە لە ماڵ دەرچوو و بێسۆراخ بوو، دواتر لە رێگەی گرتە ڤیدیۆییەکەوە دەرکەوت کە لە بەرەکانی جەنگ لە ریزەکانی سوپای رووسیا چەکی هەڵگرتووە.

 

کەسوكاری مەتین بە تۆڕی میدیایی رووداویان راگەیاند، کوڕەکەیان لەلایەن گرووپێکەوە هەڵخەڵەتێندراوە و براوەتە رووسیا بۆ بەشداریکردن لە شەڕی دژی ئۆکراینا. 

 

ئاماژەیان بەوەش کرد، ئەمڕۆ پێنجشەممە 05-02-2026، لەلایەن حکومەتی هەرێمی کوردستان و هەڵگورد شێخ نەجیب، سەرپەرشتیاری ئیدارەی سۆرانەوە، هەواڵی گیانلەدەستدانی کوڕەکەیان پێدراوە.

 

بنەماڵەی مەتین برادۆستی دەڵێن: "چاوەڕێی گەڕانەوەی تەرمی کوڕەکەمان دەکەین و تاوەکو تەرمەکەی نەگەڕێتەوە، پرسەی بۆ دانانێین."

 

هەڵگورد شێخ نەجیب، سەرپەرشتیاری ئیدارەی سەربەخۆی سۆران بە رووداوی راگەیاند: "هەواڵی نەمانی ئەو گەنجەمان لە رێگەی نوێنەرایەتیی حکومەتی هەرێمی کوردستان لە رووسیاوە پێگەیشتووە. ئێستا لەگەڵ لایەنە پەیوەندیدارەکان لە هەوڵداین بۆ ئەوەی بتوانین تەرمەکەی بگەڕێنینەوە بۆ هەرێمی کوردستان."