ترەمپ لەبارەی جەنگی ئێران: هەڕەشەیەکی گەورە لادەبەین

 

 

ترەمپ لەبارەی جەنگی دژی ئێرانەوە دەڵێت: "خەڵک ئەوەی پێ خۆشە کە روودەدات. ئێمە هەڕەشەیەکی گەورە لەسەر ئەمریکا لادەبەین."

 

سەبارەت بە توانای سەربازیی ئێران، ترەمپ گوتی: "هیچ هێزێکی دەریاییان نەماوە، هێزی ئاسمانییان نەماوە، رادارەکانیان لەنێوبردراون و سوپاکەیان تێکشکێندراوە. تەنیا بوێرییان ماوە."

 

ترەمپ گوتی، ئەمریکا لە دیاریکردنی سەرکردەی داهاتووی ئێران دا رۆڵی دەبێت و گوتی: "کاریگەریی گەورەم دەبێت، کار لەگەڵ خەڵک دەکەین بۆ ئەوەی کەسێک بێتە سەر دەسەڵات کە ئێران بنیات بنێتەوە، بەڵام بێ چەکی ئەتۆمی."

 

 

سەرۆکی ئەمریکا پێشبینی دەکات دوای ئێران، حکومەتی کوبا بڕووخێت. ترەمپ دەڵێت بەهۆی بڕینی نەوتی ڤەنزوێلا کە تاکە سەرچاوەیان بوو، کوبا لە دۆخێکی خراپدایە.

 

ترەمپ گوتی: "کوباش دەڕووخێت. ئەوان پێویستیان بە یارمەتییە و گفتوگۆمان لەگەڵ دەکەن."

 

 

ترەمپ جارێکی دیکە رەخنەی لە سەرۆکی ئۆکراینا گرت و گوتی: "زیلینسکی دەبێت بێتە سەر هێڵ و رێککەوتن بکات."

 

بە گوتەی ترەمپ، ڤلادیمیر پووتین، سەرۆکی رووسیا ئامادەیە بۆ رێککەوتن، بەڵام زیلینسکی ئاستەنگ دروست دەکات. 

 

ترەمپ گوتی: "تێناگەم بۆچی ئەو [زیلینسکی] دەبێتە ئاستەنگ. تۆ کارتی بەهێزت بەدەستەوە نییە، ئێستا کارتەکانت کەمترن."

 

 

سەبارەت بە کێشەی پێنتاگۆن لەگەڵ کۆمپانیای ژیریی دەستکردی  Anthropic کە خاوەنی بەرنامەی Claudeـە، ترەمپ گوتی: "من ئەنترۆپیکم دەرکرد. ئەوان لە کێشەدان، چونکە وەک سەگ دەرکران، نەدەبوو وا بکەن".

 

ئەم قسانەی ترەمپ لە کاتێکدان کە ئەنترۆپیک رەتیکردەوە ژیریی دەستکردەکەی لە لایەن پێنتاگۆنەوە بۆ مەبەستی سەربازی بەکاربهێنرێت.