ناسنامەی دوو لە هێرشکارەکانی لەندەن ئاشکراکرا

رووداو - لەندەن

پۆلیسی لەندەن ناسنامەی دوو لە هێرشکارەکانی لەندەنی ئاشکراکرد و رایگەیاند، هێرشکارەکان ناویان رەشید رەزوان و خورام شازادـە. 

بەپێی میدیاکانیش خورام شازاد تەمەنی 27 ساڵە و خەڵکی پاکستانە، ژن و منداڵی هەبووە و رەشیدیش تەمەنی 30 ساڵ بووە. 

میدیاکانی بەریتانیاش بڵاویانکردەوە، خوڕەم بە "ئەبو" یان "ئەبو زەیتون" ناسراو بووە و کاتێک منداڵ بووە لەگەڵ دایک و باوکی لە پاکستانەوە چوونەتە بەریتانیا و لە رۆژهەڵاتی لەندەن ژیاون. 

یەکێک لە دراوسێکانی رایگەیاند، خوڕەم زۆر حەزی لە یاری تۆپی پێ بووە و هاندەری یانەی ئارسناڵیش بووە. 

میدیاکانی بەریتانیا بڵاویانکردەوە کە رەشید رەزوانیش بە رەچەڵەک مەغریبی و لیبی بووە.لێکۆڵینەوە بۆ دیاریکردنی ناسنامەی هێرشکاری سێیەمیش بەردەوامە. 

کاژێری 10ـی شەوی شەممە 3-6-2017 بە کاتی بەریتانیا، ئۆتۆمبێلێکی بارهەڵگری سپی لەسەر پردی لەندەن و لە ناوەڕاستی ئەو شارە خۆی کرد بەنێو هاووڵاتیاندا، بەهۆیەوە حەوت کەس کوژران و 50 کەسی دیکەش برینداربوون.

داڕشتنەوە؛ راوچی حەسەن